Greba orokorra asteartean, martxoaren 17an, Hego Euskal Herri osoan, baita honenbestez, Usurbilen ere, 1.500 euroko Lanbidearteko Gutxieneko Soldata propioaren alde. Greba egun arrakastatsua izango dela aurreikusi dute deitzaileek.
"Grebaren aldeko atxikimendua oso zabala izaten ari da", jakinarazi dutenez. Dagoeneko, gutxienez "grebaren aldeko atxikimendua eman dute 1.750 enpresa komitek eta pertsonal batzordek; gainera, 100 eragile sozial baino gehiago ere atxikitu dira: gazteak, ikasteak, eragile ekologistak, antirrazistak, feministak, pentsiodunak, guztiek elkarrekin bat egingo dute greban".
Greba egun hau, gutxieneko soldata propioa exijitzeko soilik ez, "gerraren kontrako eta justizia sozialaren" aldekoa ere izango dela gaineratu dute deitzaileek. "Bizitzaren garestitzea areagotzen ari da Ameriketako Estatu Batuak eta Israel Ekialde Hurbilaren aurka egiten ari diren eraso inperialisten ondorioz, eta, hain zuzen ere, garestitze horri aurre egiteko neurriak dira greba orokorrarekin aldarrikatuko direnak: aberastasuna banatzea, soldatak hobetzea eta LGSa hemen erabakitzea".
Bat egitearen garrantzia
Greba deialdiarekin bat egiteko garrantzia nabarmendu dute sindikatu deitzaileek. "Greba orokorrarekin bat eginda, langile bakoitzaren ekarpenak lagundu egingo du, batetik, patronalarekiko negoziatzeko indar harremana hobetzen, eta bestetik, alderdi politikoak interpelatzen. Lanbidearteko gutxieneko soldata propio baterako aukera gero eta gertuago" dago sindikatuon esanetan".
Izan ere, "LGS propio bat lortzeko aukerek zabalik jarraitzen dute, hala ondorioztatu dute eragileekin egindako errondatik". Ildo horretan, "martxoaren 24an Confebaskekin eta martxoaren 25ean CENekin beste negoziazio saiakera bana egiteko jarria dute hitzordua, eta, azpimarratu dutenez, patronalarekin egon ondoren, are argiago dago gutxieneko soldata bat ezartzeko akordio intersektoriala posiblea dela, haren aurkako argudio tekniko juridikorik ez baitago".
Jarrera desberdinak
Grebak izandako harreraren inguruan, jarrera desberdinak topatu dituzte "eragile politiko eta instituzionalen artean". Hala, "kritikatu egin dute EAJk, PSEk eta PSNk modu antidemokratikoan HELaren eztabaida eragotzi nahi izatea. Aldiz, balioan jarri dute EHBilduk eta Geroa Baik sindikatuon eskaerekin bat egitea, eta HELaren blokeoaren ondotik, EAEko eta Nafarroako Legebiltzarrean eztabaidari bide eman izana".
Madrilen egindako errondan, "txalotu egin dute Euskal Herriko, Galizako eta Kataluniako sindikatu soberanistek eskatu moduan, alderdi soberanista batzuk erakutsitako borondatea Langile Estatutua moldatuko lukeen Lege Proposamena Kongresura eztabaidara eramateko. Alderdiei eskatu diete sindikatuen proposamena bere horretan errespetatzeko; eta, ildo beretik, gobernuko alderdi diren PSOEri eta Sumarri eskatu diete trabarik ez jartzeko".
Manifestua: "Martxoaren 17an greba orokorra. Gutxieneko soldata hemen eta orain"
Ez dira garai errazak langile eta herri sektoreontzat. Egunero darabilgun hiztegian krisi hitza ageri zaigu. Krisi ekonomikoa, politikoa, soziala, ekologikoa, zaintza lanena. Mundua hankaz gora jarrita du sistema kapitalista patriarkal, ekozida eta arrazistak; joera autoritario eta faxistak hedatuz, gerra inperialistak eraginez, pobrezian eta prekarietatean sakonduz. Aberatsak aberatsago, boterea geroz eta esku gutxiagotan eta langile sektore geroz eta gehiago bazterrean. Emakumeok*, gure sorterria utzi dugun pertsona migratuok, arrazializatuok, aniztasun funtzionala dugunok, gazteok edo sexu-genero disidenteok kapitalaren ofentsibaren jo puntuan gaude.
Euskal Herria ez dago errealitate horretatik salbu. Patronala eta agintari politikoak eskutik helduta doaz, aberastasuna modu justuan banatzeko edozein neurri blokeatzeko asmoz. Horixe da gutxieneko soldatarekin ere gertatzen ari dena. Bertan bizi garenon oinarrizko beharrak asetzeko diru sarrera nahikoa izatea ekidin nahi dute, eta dagoeneko pairatzen ditugun arrakala sozialetan sakondu. Aldarrikapen zilegi, justu eta egingarri bati bide guztiak itxi dizkiete.
Pobrezia eta prekaritatea hedatzen jarraitzen dute, eta horren ondorioek eragina dute gure gorputzetan, osasunean, harreman sozial eta laboraletan eta baita gure eskubideetan ere. Bizi proiektu desiragarriak eta duinak ezinezkoak bilakatzen ari dira geroz eta langile sektore gehiagorentzat.
Baina hemen gaude gu: egunero herri eta auzoetan antolatzen garen hamaika eragile sozial eta herri mugimendu. Etxebizitzaren negozioaren aurka mobilizatu eta etxegabetzeek ekiditeko gure gorputza jartzen dugunak; ikusezin bilakatu nahi duten lana aitortu, balioa eman, aldarrikatu eta gure historiako lehen Greba Feminista Orokorra antolatu genuenak; pentsioak duindu eta, pobrezia atalasearekin baino, LGSarekin parekatzeko borrokan ari garenak; aniztasun funtzionala duten pertsonen eskubideek sustatzeko lanean gabiltzanak; gure lurraldea Harrera Herria izan dadin egunero afariak eskaini, migrazio prozesuak babestu eta pertsona guztien eskubidea guztiak defendatzen ditugunak; hemen batu gara planetaren muga biofisikoak gaindituta daudela jakitun, lurraren defentsan eta trantsizio ekosozial justuaren aldeko militanteak; gure hizkuntza biziberritu dadin eta gure herriaren erabakitzeko eskubidearen alde lanean ari garenak; xamurtasun internazionalista hezurmamitzen dugunak; bestelako mundu bat posible eta beharrezkoa dela aldarrikatzen dugunak.
Forma eta modu desberdinak ditugu. Ez gaude ados hainbat gauzetan, baina guztiok bat egiten dugu oinarrizko ideia batekin: Euskal Herrian gutxieneko soldata propioa izatea bertan lan egiten dugun eta bizi garen pertsona guztientzako onura dakarren aldarrikapena da. Kontsekuenteak izan nahi dugu, eta ez dugu normalizatu nahi Euskal Herrian zaintza sistemak egun duen egitura klasista, arrazista eta patriarkala. Lan harreman justuak sustatu nahi ditugu, baita etxeko lanaren eta zaintza lanaren esparruan ere, zeinetan, askotan, gaur egun dagozkien soldatak ere ez dizkieten ordaintzen eta dagozkienak baino askoz ordu gehiago sartzen dituzten.
Horregatik, gaur hemen bildu garenak eta adierazpen honekin bat egiten dugunok gure konpromisoa adierazi nahi dugu. Herri eta auzoetako Greba Batzordeetan parte hartuko dugu. Greba honen aldeko pedagogia eta politizazio lana egingo dugu, langileei, eta oro har herritarrei, deialdiaren arrazoiak azalduz eta deialdiarekin bat egin dezaten.
Badira Etxe Zurira joan eta milaka herritarren heriotza eragiten duten agintarien morrontzan negozioak egin nahi dituztenak. Badira, haien bulegoetan hartutako erabakiek mina eta sufrimendua eragiten dutela jakinda ere, lotsagorritzen ez direnak. Ondokoa zapaldu, errentetatik bizi, ezberdina dena kriminalizatu eta zapalkuntzak betikotzeko botere politiko, ekonomiko eta sinbolikoa erabiltzen duten pertsonak. Badira horietakoak. Baina ez dira gehiengoa, eta gu ez gara horietarikoak. Gu aurrez aurre izango gaituzten langile eta herri antolatua gara.
Argi eta garbi diogu: borroka hau irabaztera goaz. Martxoaren 17an dena gelditzeko deialdia egiten dugu. Lan guztiak desnormalizatzera deitzen dugu. Greba egitea ezinezkoa dutenak presente, greba babestera deitzen dugu. Sinetsita gaude borrokak merezi duela eta lortu dezakegula.
Martxoaren 17an, gutxieneko soldata hemen erabaki. Gure bizi-baldintzei, gure soldatei eta gure etorkizunari buruz erabakitzeko burujabetza aldarrikatzen dugu. LGS 1500. Hobetu ditzagun soldatak aberastasuna banatzeko!
Lehen atxikimenduak:
Aiaraldeko Greba Batzordea · SOS Aiaraldea · Amara Berri Ehuntzen · Amurrioko Gazte Asanblada · Amurrioko Emakumeon* Sarea – Red de Mujeres* de
Amurrio · Arteako Herriko Benta · Asociación de Empleados y Empleadas de Hogar de Navarra. ATHCA/AEZLE · ATH-ELE · Auzoan Bizi Etxebizitza Sindika-
tua · AZET Etxebizitza Sindikatua · Bakea eta Duintasuna – OMAL · Basauriko Asanblada Feminista · BATUTA Judimendi · Bilbo Palestina Herri Ekimena ·
Colectivo Bachué Elkartea · Congreso de los Pueblos · Denon Bizitzak Erdigunean · Donostiako Harrera Sarea · Eginaren Eginez · Euskal Gune Ekosozialista ·
Euskal Herriko Bilgune Feminista · Euskal Herrian Euskaraz · Euskal Herriko Gazte Feministak · Euskal Herriko Etxebizitza Sindikatuen Sarea · Euskal Herriko
Pentsiodunen Mugimendua · Ernai · Errotik (Gasteizko ikasle feministak) · Gerrarik EZ Euskal Herria · Gure Esku · Haritu Etxebizitza Sindikatua · Hitz&Hitz
fundazioa · IKAMA · Irungo · Harrera Sarea · Jardun Koordinadora · Jauzi Ekosoziala · Kiskali. Basauriko gazte talde feminista · Koordinadora antimilitarista
Kakitzat · Malen Etxea – Mujeres Migrantes · Mugak Zabalduz · Nafarroako Osasun Publikoaren Aldeko Plataforma · ONEKA – EH Emakume Pentsionisten
Plataforma · Ongi Etorri Errefuxiatuak Araba · OPA Herri Plataformak · Sagarrak talde ekologista · Saretxe Etxebizitza Sindikatua · Sasoia · Sorginenea · THYC-
NA – Trabajadoras de Hogar y Cuidados de Navarra · Trabajadoras No Domesticadas · Usurbilgo Xauxar txosna batzordea
Manifestuari atxikimendua adierazteko aukera dago, helbide honetan: https://labur.eus/M17Atxikimenduak
1.500 euroko Lanbidearteko Gutxieneko soldata propioaren alde astearterako, martxoaren 17rako deitua dagoen greba orokorra arrakastatsua izango dela aurreikusi dute ELA, LAB, Steilas, Hiru eta Etxalde sindikatuek. Gutxienez, 1.750 enpresa komitek eta pertsonal batzordek eta 100 eragile sozialek baino gehiagok bat egin dute biharko deialdiarekin.