Ezohiko asteartea gaur Hego Euskal Herrian, tartean, Usurbilen. Eguneroko herri bizitza etenda dago. Ezohiko isiltasunarekin esnatu zaigu eguna eta berdintsu doa martxoaren hamazazpigarren hau. Isiltasuna hautsi duten bakarrak goizeko lehen orduan egin diren mobilizazioak izan dira, eta gerora, klase eguna ez zutenez, jolasean zebiltzan haurrak.
1.500 euroko Lanbidearteko Gutxieneko Soldata propioa exijitzeko greba orokorra deitua dute gaurko ELA, LAB, Steilas, Etxalde eta Hiru sindikatuek. Erabateko eragina izan du herriko saltokietan. Salbuespen gutxi batzuk kenduta, pertsianak jaitsita daude goizean goizetik, taberna, jatetxe eta komertzioetan. Izan ere, ostalariek eta merkatariek bat egin dute gaurko greba deialdiarekin.
Udaberri giro beteko eguna izan arren, terrazako eserleku eta mahaiak jasoak dituzte ostalariek. Askotariko dendak ere pertsianak jaitsita, ateak itxita, haien eguneroko jarduna etenda 24 orduz.
Haietako hainbat biltzen ditu Hurbilago elkarteak. Bilgune horrek azken orduotan jakinarazi duen moduan, "Hurbilagoko establezimendu batzuk bat egingo dute martxoaren 17ko greba orokorrarekin, eta, beraz, beraien saltokiak itxita egongo dira egun osoz". Horren harira, gaurko beharrezko erosketak aldez aurretik bideratzea galdegina zuten eta erosi beharrekoa, noski, "herriko denda txikietan" erostea.
Greba orokorrarekin bat egin eta itxita zeuden hainbat saltokietan ikusi ditugu deialdiarekin bat egin dutela jakinarazten zuten Hurbilagoren kartelak, establezimenduon erakusleiho edo ateetan esekita.
NOAUA! K.E.
Kultur elkarte honek ere bere eguneroko jarduna etenda dauka. Bordaberri kaleko egoitza itxita dago. Besteak beste, egunerokoan eskaintzen duen Zirimara egitasmoa ere bertan behera geratu da, langileek gaurko deialdiarekin bat egin ostean.
Kultur elkarteko eta hedabide honetako lantaldeak greba egun hau babestu du. Soilik, greba orokorrari buruzko informazioa eskaintzen ari gara atari honen nahiz sare sozialen bidez.
Ver esta publicación en Instagram
