Hutsik dago Usurbilgo bake epaile ordezkoaren lanpostua. Hura betetzeko iragan udazkenean udalbatzak eginiko deialdira ez zen inor aurkeztu. Horregatik, orain deialdi hori onartu eta abiarazi du udal organu berak.
Martxoaren 26ko osoko bilkuran udalbatzak aho batez onartu zuen, "hilabete bateko epea finkatzea iragarkia Gipuzkoako Aldizkari Ofizialean argitaratzen den biharamunetik kontatzen hasita, Usurbilgo Bake Epaile ordezkoa izateko interesa dutenek eskaerak aurkeztu ditzaten. Eskaerak udaletxe honetako erregistroan edota Administrazioko Jardunbidea arautzen duen Legediak xedaturiko eran aurkeztu beharko dira".
Bigarrenez
Aipatu moduan, hilabete gutxiko tartean, bigarren aldiz egin du udalbatzak bake epaile ordezkoa hautatzeko deialdia. Lehen saiakera, iragan irailaren 25ean egin zuen udalbatzak osoko bilkuran. Orduko hartan, "EAEko Auzitegi Nagusiko Gobernu Idazkaritzatik jasotako idatziaren ondoren, udalbatzarrak Usurbilgo bake epaile titularra eta ordezkoa hautatzeko deialdia egitea erabaki zuen" aho batez.
Deialdi hartara hautagai bakarra aurkeztu zen. Bi hilabete geroago, azaroaren 26ko osoko bilkuran, hautagai hori bake epaile titularra izatea proposatu zuen udalbatzak eta gerora, EAEko Auzitegi Nagusiko Gobernu Idazkaritzak hautagai honen (Agustin Esnaola Etxabe herrikidea) izendapena onartu zuen.
Aldiz, "beste hautagairik ez zegoenez, ordezkorik ez zen izendatu". Ondorioz, "martxoaren 2an EAEko Auzitegi Nagusiko Gobernu Idazkaritzako idatzia" jaso zuen Udalak, "Usurbilgo Bake epaile ordezkoa izendatzeko dagokion jardunbideari hasiera ematea eskatzen" ziona.
Udalbatzak hautaketa hauek bideratzeko eskumena duenez, aipatu moduan, martxoaren 26ko osoko bilkuran onartu zuen prozesu hori abiaraztea. Bake epaile ordezkoa izateko hautagaiek baldintza hauek bete beharko dituzte: espainiar estatuko nazionaliatea izatea, adinez nagusia izatea eta "Botere Judizialeko Lege Organikoko 102., 302., 303. eta 389. artikuluek kargu judizialetarako aurreikusitako ezgaitasun eta bateraezintasun kausak ez edukitzea". Horrez gain, "honako merituak ere baloratu ahal izango dira: bizilekua, curriculuma eta euskararen ezagutza".
Bake epaile titularra eta ordezkoa hautatzeko udalbatzak onarturiko iragan iraileko deialdira hautagai bakarra aurkeztu zen; egun, bake epaile titularra dena. Ordezkoa hautatzeko deialdia onartu zuen udalbatzak martxoaren 26an eginiko osoko bilkuran.