Topaketa jendetsua larunbat goiz honetan, apirilaren 11n Haranen. Gutxitan ikusi ohi den futbolari kopurua bildu du Usurbil F.T.-k. Aldi berean, hiru bat neurketa jokatzen aritu dira 9:30etan hasita eguerdi partera arte. Futbolean aritu dira lagunartean, garai batean futbol taldeen bilguneak sustaturiko txapelketan bezala. Izan ere, Usurbil Cup ekimena gogora ekarri nahi izan du Usurbil F.T.-k 50 urte bete dituen honetan prestatua duen ospakizun zikloaren harira; "Usurbil Cup Remember" izena jarri diote hain zuzen, aipatu ekimenari.
Bestelakorik iragarria zegoen arren, goizeko lehen orduko euri zaparrada salbu, ateri izan dute hein handi batean txapelketak iraun duen artean. Dinamika biziko hitzordua izan da. Neurketa motzak eta denen parte hartzea izan ditu ardatz kirol ekintza horrek.
Arratsaldean segiko dute Usurbil F.T.-k antolaturiko 50. urtemugako ospakizun zikloko ekimenek. 16:00etan hasita mus txapelketa antolatu dute Haranen. Ordu-erdi lehenago irekiko dute lehiaketarako izen-ematea.
50 urte bete dituen Usurbil F.T. ekainaren 27rako egun osoko jaialdia prestatzen ari da. Mende erdia ospatzeko egun nagusia izango da. "Klubarentzat egun handia izango da. Goizeko ekintzetatik hasi eta gaueraino, gelditu gabe jarduera ezberdinak" antolatuko dituzte.
Sare sozialen bidez jakinarazi nahi izan dute, "ekainaren 27an Usurbil F.T.-ren 50.urteurrena dela eta egun handia antolatu dugula goizetik hasi eta gaueraino".
50. urtemugako egitaraua guztiz zehazteke dutela adierazi arren, finkatua dutena da bazkaria antolatuko dutela. Horri begirakoa da hain zuzen, kaleratua duten oharra. "Etorriko den jende kopurua jakin nahi dugu, antolatzen jarraitzeko", zehaztu dute Usurbil F.T.-tik. Izan ere, argitu dutenez, leku kopurua mugatua izango da eta izena ematen lehenengoak direnak izango dute lehentasuna otordu horretan egoteko.
Horregatik, otordu horretarako aurrez izena emateko epealdia irekitzea erabaki dute. Horretarako, galdetegia osatu beharko da maiatzaren 3a baino lehen. Horren harira, zenbait argibide eskaini ditu Usurbil F.T.-k. Batetik, inskripzio hau bideratzen dutenek lehentasuna izango dute gero izena emateko. Galdetegia osatzen dutenek hain zuzen, email bat jasoko dute izen-emate ofiziala lehenago egin ahal izateko. Ondorioz, orain apuntatzeak ez du esan nahi bazkarira joan beharko denik.
Otordura 16 urte beteak dituztenek edo hortik gorakoek joan ahalko dute, "gurasoekin ez bada". Ordainketak izen-emate ofiziala egiterakoan bideratu beharko dira.
Usurbil F.T.-tik ohartarazi dutenez, "aurre izen-ematea bete dutenekin aforoa beteko ez balitz, soberan dauden eserlekuak libre jarriko dira edonork izena eman dezan".
Futbol taldeen bilgunearen 50. urtemugako otordurako aurrez izena emateko galdetegirako lotura honako hau duzue:
Usurbil F.T.-ren 50. urtemugako bazkaritarako aurrez izen-emateko galdetegia
