Usurbil herri zaintzaileagoa bilakatzeko bidean, asteartero izaten da nabarmentzeko moduko ekarpena egiten segitzen duen "Goazen Kalera" dinamika. Gaur, ekainak 23, asteartea da, baina ez da ibilaldi osasuntsurik izango egunotako beroaldiagatik. Gogoan izan, aste hasiera honetan udal sail hainbaten artean eginiko "larrialdi bileran", gomendio eta neurri sorta aztertu eta onartu zuen Udalak, beroaldiagatik egunotan indarrean jarritako alarma eta alerten harira.
Besteak beste, "aire zabaleko jardueretarako, pertsona zaurgarrienei begirako eta laneko arriskuen ingurukoak" aztertu zituzten. Pertsona zaurgarrienei dagokienean Udalak erabaki zuenez, astearte honetako, "ekainaren 23ko Goazen Kalera saioa bertan behera geldituko da, paseoa gauzatzeko baldintza egokirik ez delako izango".
Udalak eragile gehiagorekin lankidetzan, abiarazitako ibilaldiek segida izango dute, aldaketarik ez bada, hurrengo asteartean, ekainaren 30ean herri erdigunean barrena. Hurrengoak, uda osokoak ere bertan izango dira. Gogoan izan, asteartero egin ohi dira paseo horiek, 10:30-12:00 artean. Aurrerantzean egingo direnak paseo motzak izango dira, eta amaieran kafetxoa hartzeko aukera izango da lagunartean.
Abuztura arte
Ibilaldi osasuntsuon egutegia kaleratu zuten urte hasieran antolatzaileek eta bada nobedaderik. Izan ere, abuztura arte luzatuko da aurten. “Udan ohikoa izaten da hainbat zerbitzu itxi edo etetea, ordutegiak aldatzea, denden ordutegiak murriztea, herria hustea... eta horrek adinekoengan sortzen duen bakardadea arintzeko eskaintza egin zen. Zaintza ekosistemaren barruko zerbitzuen lantaldeak eskaintza berri bat egitea proposatu zuen: ordura arte ez bezala, Artzabalgo Eguneko Arreta zerbitzua abuztuan ere eskaintzeaz gain, astean behin, paseo motz bat eman eta kafe baten bueltan tertulian aritzea proposatu zuten: harrera beroa izan zuen, 35 bat herritarrek parte hartu baitzuten saio horietan. Hala, ekimenaren balorazio positiboa eginda, aurten ere errepikatzea erabaki da, eta, ikaslerik gabe bada ere, udako asteroko hitzorduak ezarrita daude, dagoeneko, egutegian”.
Elkarren arteko zaintza
Herri osoari zuzendurikoak dira ibilaldi hauek. Edonork parte har dezake, doan, aurrez izena eman beharrik izan gabe.
“Ariketa fisikoa egiteaz gainera, belaunaldi artekotasuna sustatzea eta elkarren arteko zaintza eta harremanak bultzatzea ditu helburu Goazen kalera, Usurbil ekimenak”, antolatzaileen esanetan.
Informazio gehiago bideotatik jaso ahalko da:
Gizarte zerbitzuen egoitza: Kale Nagusia, 43
943 371 951
Egutegia
Ordua: 10:30-12:00.
Abiapuntua/helmuga: tokian tokiko frontoia.
Oharrak:
-Ekainaren 16tik aurrera, paseo motzak. Kafea, Artzabalen.
Ekaina
23: bertan behera.
30: herri erdigunean.
Uztaila
7, 14, 21, 28: herri erdigunean.
Abuztua
4, 11, 18, 25: herri erdigunean.
Informazio gehiagorako:
Kale Nagusia, 43
943 371 951
Astearteroko "Goazen Kalera" dinamika bertan behera utzi du Usurbilgo Udalak, egunotako beroaldia tarteko. Aldaketarik ez bada, hurrengo hitzordua, ekainaren 30ean izango da.