Udako festen garai betean jarraitzen dugu. Ohi bezala, ospakizunon zikloari ekiten lehena izan ziren, ezohiko bero bolada betean ospaturiko Kalezarko jaiak. Ekainaren 19tik 24ra, auzotarrak herri kirol desafioan neurtu, musean nahiz tokan lehiatzeko aukera izan zen. Haur eta gaztetxoei zuzenduriko eskaintza zabal askoa antolatu zuten, kros, jolas, tailer edota txokolate janarekin. Lauburu Usurbilgo Erraldoi eta Buruhandien Konpartsak aurtengo lehen kalejira egin zuen Kalezarko festetan eta harrera ezin beroagoa egin zitzaion hitzorduari, Orbeldiri bezalaxe; dantza taldeak udako birako lehen emanaldia eskaini zuen. Horrez gain, Zirkuolak zirku erraldoian bilakarazi zuen Egurtzegi ataria.
Bero egin zuen Kalezarko jaietan, ezohiko beroaldi betean ospatu zen ekainaren 23ko gaua. Bero sapa artean eginiko eskearen ondotik, segurtasun neurri zorrotzagoen artean piztu zuten sua kopla eta dantza giro betean. Biharamunean, erromeria giroan agurtu zituzten aurtengo Kalezarko jaiak, sardin eta sagardo dastatze ederrarekin.
Kalezarko jaien irudi-bilduma esteka honetan duzue ikusgai: https://noaua.eus/bereziak/kalezarko-jaiak-2026
Usurbilgo jaiak
Usurbilgo jaiek hartu zieten lekukoa Kalezarkoei uztaila hasieran. Oilasko biltzaileek eta 50 urte betetako Usurbil F.T.-ren eta Zubieta Lanbide Eskolaren eskutik murgildu gara aurtengo bost eguneko jaien zurrunbiloan, baita etsipenaren aurkako "Gerri-Buelta" saio berezia antzezturiko gazte txupinazoarekin ere. Denontzako eta denetariko uneak izan dira. Egunez, Santixabel jaia ospatu zen uztailaren 2an soka-dantza, Triku taldekoen kalejira, pilota txapelketaren final, bertso saio, museko nahiz "auntoke" ekimeneko lehiarekin; Haurren Eguna, jolas, txokolate jan, txutxu tren, apar festa edota Lauburu konpartsakoekin kalejirarekin. Egun hura, uztailaren 3koa, gazteena eta helduena izan zen baita; jubilatuen txapelketa eta bazkariarekin nahiz gazte bazkariekin eta haren osteko kalejirarekin.
Herritarren arteko kirol desafio itzela jokatu zen uztailaren 4an, parte hartze marka guztiak hautsitako zikiro janaren aurretik. Sutargiren erromeriak, errekortariek edota Laskotxarangak girotu zuten larunbat arratsalde hura.
Jaietako azken eguna, gaupaseroen argazkiarekin eta joaldunen birarekin esnatu zen, paella janak eta mariatxiek girotu zuten, azken traka ikusgarriaren aurreko tartea. Gaua argitu zuen aurtengo zaindaria, Martin arrantzalea birrindutako hitzorduak. Aurrekoak musikatu zituzten, besteak beste, Bertsio Gauak edota Izan Bai taldearen emanaldiak.
Usurbilgo jaien irudi-bilduma esteka honetan duzue ikusgai: https://noaua.eus/bereziak/usurbilgo-jaiak-2026
Datozen jaiak
Kalezarko eta Usurbilgo festak igaro dira, baina jai giroa ez da apalduko hurrengo asteotan. Izan ere, Usurbilgo beste hainbat herri eta auzoetako ospakizunak bueltan izango ditugu laster. Jai batzordeak prestaketa lan betean dira asteotan. Haiek hilabeteotan osaturiko ekimenen eskaintza plazaratzen lehenengoak Zubietakoak izango dira. Aurtengo Zubietako Herri Jaiak uztailaren 24tik 31ra ospatuko dira.
Segidan, haiek agurtu eta Urdaiagakoek hartuko diete lekukoa abuztu hasieran eta hurrengo hilabetea agurtzeko, Atxegalde murgilduko da jai giro betean, hilaren 28tik 30era hain zuzen.
Ospakizun ziklo horiei guztiei buruzko xehetasun gehiago, datozen egunotan jasoko dituzue.
Kalezarko eta Usurbilgo jaien ondotik, Zubieta, Urdaiaga eta Atxegaldekoen txanda izango da uda honetan.