Udazkeneko lehen abisuaren ohartarazpena egin du Euskalmet meteorologia agentziak. Izan ere, larunbat arratsalde eta iluntzean, urriaren 3an, abisu horian izango gara "prezipitazio handiagatik" eta baita "prezipitazio iraunkorragatik" ere. Euskalmet-en arabera, arratsaldeko 18:00etan hasi eta igande goizaldeko 6:00ak arte.
Prezipitazio iraunkorrak izan ditzakegu. "Hamabi orduan 60 l/m² baino gehiago pila daiteke. Zaparrada ertainak eta trumoitsuak egingo ditu, zenbait lekutan iraunkorrak izan daitezke eta baliteke handiak izatea; ez da baztertzen oso handiak izatea", Euskalmet-ek ohartarazi duenez.
Horrez gain, prezipitazio handiagatik ere abisu horian izango garela jakinarazi du aipatu meteorologia agentziak. "Ordubetean, 20 l/m² baino gehiago pila daitezke; zenbait lekutan 30 l/m² baino gehiago pilatuko direnik ezin da baztertu. Zaparrada ertainak eta trumoitsuak egingo ditu, zenbait lekutan handiak izan daitezke, eta ez da baztertzen oso handiak izatea", Euskalmet-en arabera.
Aipatu meteorologia agentziaren arabera, larunbatean, "arratsalde-gauean, zaparrada trumoitsu ertainak egingo ditu. Baliteke noizbehinka handiak izatea. Goizean goiz hego-ekialdeko haizea ibiliko da, arratsaldean ipar-ekialdekoa. Tenperatura minimoak nahikoa igoko dira, maximoetan aldaketarik ez edo gutxi igoko dira".
Igandean, urriaren 4an, "zerua oso hodeitsu egongo da. Noizbehinka zaparrada trumoitsuak egingo ditu. Ipar-haizea nagusi. Tenperatura minimoetan aldaketarik ez edo gutxi igoko dira, maximoak gutxi edo nahikoa jaitsiko dira".
Astelehenean, hilaren 5ean, Euskalmet-en arabera, "zerua tarteka hodeitsu egongo da; hodeitza ugariagoa izango da egunaren bigarren partean. Euria eta zaparrada batzuk egin ditzake, bereziki egunaren bigarren partean. Eki-osagaiko haize ahul-bizia ibiliko da.. Tenperatura minimoetan aldaketarik ez. Tenperatura maximoetan aldaketarik ez edo gutxi igoko dira".
Informazio eguneratua euskalmet.eus bidez jaso ahalko duzue.
Ekaitz arriskua tarteko, larunbat arratsaldetik igande goizaldera arte abisu horian izango garela ohartarazi du Euskalmet meteorologia agentziak.