Badator Booktegi jaialdia, izen bereko elkartearen eskutik. 2022an antolatzen hasitako hitzorduaren bosgarren edizioa izango da aurtengoa. Euskarazko literatura guztion esku jartzen diharduen egitasmoa berritua itzuliko da, antolatzaileek iragarri dutenez. Izan ere, batetik, iraupenari begira, ohi baino luzeagoa izango da 2026ko Booktegi jaialdia, hiru egunekoa hain zuzen. Horrekin batera, hitzordu berriak programatzea erabaki dute.
Ekimena urriaren 30etik azaroaren 1era egingo da ohiko bi espazioetan; Zumarte Musika Eskolako ganbaran eta Sutegiko auditorioan. Iaz, "Rupertorioa" ekimenarekin ekin zioten iazko edizioari. Ruper Ordorikak idatzitako abesti bat hautatu eta nahieran, Sutegiko ikus-entzuleei eskaintzeko aukera izan zuen aurrez izena eman nahi izandako orok.
Protagonismo handiagoa izango du Ordorikak aurtengoan. Izan ere, Booktegi jaialdiari ekiteko sortzaile oñatiarrarekin solasaldia antolatu dute Sutegin eta biharamunean, haren kontzertuaz gozatzeko aukera izango da gune berean.
Mihise, "Anariketa", "Booktubers"...
Musikaren hari hori ez da etengo gainera, jaialdia amaitu arte. Izan ere, herriko talde Mihisek iaz aurkezturiko "Ahaldatu" izeneko sorkuntza lanari lotutako ikus-entzunezkoa ere proiektatuko dute Sutegin. Horrez gain, "Anariketa" izeneko ekimena ere iragarri du Booktegik, "ariketa bat non hainbat lagunek abesti bana nahi duten moduan interpretatuko duten".
Jolaserako tartea ere izango da edizio honetan, Arbaso Eguna mahai-jokoaren bidez. "Arbaso Eguna solarpunk mugimenduan inspiratutako rol-joko kolaboratibo batean oinarritzen da. Bertan, parte-hartzaileak gaur egungo gizarte- erronka batzuk konponduta dauden etorkizun batean kokatzen dira. Hortik abiatuta, atzera begiratzea eta egoera horretara iristea ahalbidetu duten erabakiak eta prozesuak irudikatzea da helburua. Horrela, erronka horien konplexutasuna ikuspegi irekiago eta eraikitzaileago batetik lantzen da, itxaropena kolektiboki ehuntzen den zerbait dela ulertuta".
Hitzordu hauekin guztiekin batera, bi ekintza klasiko jaialdi honetan. Batetik, gai zehatz baten bueltan sortutako ipuinak tarteko, sortzaile ezagunen arteko "Elkarri irakurriz" izeneko solasaldiak izango dira Zumarte Musika Eskolako ganbaran.
Bestalde, iaz "Booktuber" lanetan jardun zuten Udarregi ikastolako LH5. mailako ikasleek. Aurrez landutako proiektua aurkeztu zuten Booktegi jaialdiaren baitan. "Guk gure liburu gustukoak hartu, irakurri eta gero gure artean ideiak partekatu ditugu". Ekintza hori aurtengo egitarauan txertatu dute berriz.
Edizio honekin bat egiteko deia egin dute antolatzaileek. "Booktegiren irakurle guztiak gonbidatuta zaudete, eta lagunak ere ekartzen badituzue, lagunak ere ongi etorriak izango dira!".
Booktegi jaialdia
Urriak 30, ostirala
19:00 Solasaldia Ruper Ordorikarekin Sutegiko auditorioan.
Zehaztasunak: "2025eko Booktegi Jaialdian Rupertorio ekitaldia antolatu genuen non hainbat lagunek abesti bana hautatu zuten, eta nork bere erara zuzenean interpretatu. Aurten, Ruper Ordorikaren kontzertuaz gain, solasaldia ere izango dugu, musika, letra eta, oro har, kulturaren inguruan solasteko abagune bikaina. Solasaldiaren moderatzaileak Itxaro Borda eta Aritz Branton izango dira, eta Booktegiko bazkideek bidalitako galderak partekatuko dituzte Ruperrekin".
Urriak 31, larunbata
10:30 "Elkarri irakurriz" solasaldiak Zumarte Musika Eskolan.
Parte hartzaileak:
-Sotoa taldea: Bea Salaberri, Iñigo Satrustegi, Harkaitz Cano.
-Ganbara taldea: Amaiur Epher, Lizar Begoña eta Agustin Arrieta.
Zehaztasunak: "Bi solasaldiak urriaren 31n egingo ditugu, eta tartean mokadu bat hartzeko aukera izango dugu. Ipuinak izango dituzte mintzagai idazleek, baita literatura eta kultur orokorra ere. Irati Zubia izango da moderatzailea. Bestetik, egun horretan Amaiur ezin da etorri, eta Ugaitz Agirrek ordezkatuko du".
17:00 Booktubers bideoak.
Zehaztasunak: "Udarregi Iksatolako ikasleek, iaz bezala, hainbat liburu gomendatuko dizkigute bideo-formatuan".
Ondoren, Arbaso Eguna mahai-jokoa Sutegin.
Zehaztasunak: "Arbaso Eguna mahai-jolas narratibo eta kolaboratiboa da. Rol-jolasaren tresnak erabiltzen ditu, baina ez da beharrezkoa aurretik rol-jokoetan esperientziarik izatea. Helburua erraza da: etorkizuneko komunitate batek gaurko erronka handi bat gainditu duela irudikatzea, eta ondoren galdetzea nola iritsi garen horra".
19:00 Ruper Ordorika eta Mugalariak Sutegin.
Parte hartzaileak: Arkaitz Miner, Ruper Ordorika, Lutxo Neira eta Felix Buff.
Sarrerak: usurbilkultura.eus plataforman sarrera eskuratu eta eskudirutan ordainduko da (15 euro) Sutegi atarian.
Oharra: "18:45 baino lehenago iritsi, mesedez. Beranduago etortzen bazara eta norbaitek eskatzen badu, gerta liteke zure sarrera eskatzen duen horrek jasotzea".
Azaroak 1, igandea
11:00 Mihise musika taldearen "Ahaldatu" kontzertu baten filma Sutegin.
Zehaztasunak: "2025eko urriaren 17an, Sutegin, Mihise taldeak bere bigarren diskoa aurkeztu zuen: Ahaldatu. Kontzertua grabatu genuen, eta aurtengo Booktegi Jaialdian aurkeztuko dugu kontzertuaren filma".
12:00 Anariketa Sutegin. "Hainbat lagunek abesti bana nahi duten moduan interpretatuko dute".
Zehaztasunak: "Iazko Rupertorio ekitaldian bezala, aurten hainbat lagunek Anariren abesti bana hautatu dute, eta zuzenean abesti horiek interpretatu egingo dituzte, nork bere erara. Abesti batzuen bertsio bereziak entzun ahalko ditugu, bai eta letren inguruko hausnarketak, anekdotak, errezitaldiak ere… Interpretatzaile bakoitzak abestiaren inguruko ideiak, emozioak, pasarteak partekatuko ditu gurekin".
Izen-ematea, esteka honetan: Anariketa
Informazio gehiago: Sutegi udal liburutegian.
Sarrerak: aurrez, usurbilkultura.eus plataforman.
Informazio gehiago: booktegi.eus
Antolatzailea: Booktegi elkartea.
Euskarazko literatura guztion esku jartzen diharduen Booktegi elkartearen urteroko jaialdia hiru egunekoa izango da aurten. Ekimen berriak iragarri dituzte antolatzaileek.