Zubietako erraustegia

Ia 2.500 euro bilduta, Zubieta Lantzenen erraustegiari buruzko ikerlanerako

Errausketaren Aurkako Mugimenduak asteartean abian jarritako "crowdfunding" kanpainak 2.455 euro bilduak zituen ostegun goiz honetarako. Erraustegiaren kutsagaiak neurtzeko Zubieta Lantzenek abiaturiko ikerlanaren gastuei aurre egiteko 13.000 euro bildu nahi dituzte.

"Ederra: 24 ordutan 2.000 euroko langa gainditu dugu! Erraustegia piztuko balute, kutsadura toxikoa kontrolatuko dugu herritarrok urtez urte. Bizitza da handiena. Erraustegirik ez! Egin zure ekarpena eta lagundu kanpaina bultzatzen mesedez!", deitu du Errausketaren Aurkako Mugimenduak sare sozialen bidez.

13.000 euro behar
Egitasmo hau babestu eta finantzaketan lagunduko zuela iragarri zuen Errausketaren Aurkako Mugimenduak duela bi aste, "crowdfounding" kanpainaren bidez. Astearte honetan abiarazi dute gu guztion elkartasuna biltzeko ekimena, "norbanako eta eragileei zuzendua, herritarrok kutsadurari buruzko gure datu zientifikoak gure eskuetan izan ditzagun".

Horretarako, irailaren 24tik zenbatzen hasita, 40 egun daude. Tarte honetan, 13.000 euroko laguntza bildu nahi du Errausketaren Aurkako Mugimenduak. "Jasoko dugun diru guztia bi enpresa hauei beren lana ordaintzeko baliatuko dugu. Nazioartetik zientzialariak Euskal Herrira ekarri, laginak hartzeko estantzia ordaindu eta batez ere, gerora beren herrialdean analitika egiteak kostu hau du", berri eman du Errausketaren Aurkako Mugimenduak. 

Diru gehiago jasoko balute, "mugimendu gisa buruan ditugun ekimen batzuk prestatu eta finantzatzeko bideratuko genituzke. Beti ere, erraustegia gelditzea helburu izango duten ekimenak".

Erraustegia pizten badute, ikerketak urtero
Norbanako nahiz eragileek egin ditzaketen diru ekarpenei esker, "sari nagusia gizarteari egingo diogu denon artean, kutsadurari buruzko datuak modu gardenean jakinaraziko baititugu, eta erraustegia pizten badute, urtero-urtero egingo baititugu kutsadura ikerketak. Erraustegiek askatzen dituzten kutsadurak akumulatzaileak dira, hau da, izaki bizidunek jaten badituzte pilatzen joaten direla eta ezin direla kanporatu, horrenbestez, urtez urte kutsadura igotzen nola joango den ikusiko dugu". 

Horrekin batera, etxeko leiho nahiz balkoietan banderolak opari jasoko dira, "baita, ikerketa independentearen babesle gisa agertzeko aukera eman ere".

Ariketa hau, "autodefentsa neurri" gisa definitzen du Errausketaren Aurkako Mugimenduak. " Lagundu crowdfounding kanpaina babesten!", deitu dute.

Urtea amaitzerako Gipuzkoako Foru Aldundiak piztu nahi duen erraustegiaren kutsagaien inguruko kontrol independentea egingo zuela iragarri zuen Zubieta Lantzenek hilabete hasieran. Erraustegia laster martxan jarri dezaketenez, aurretik laginak hartu nahi zituzten, gerora behin aipatu planta martxan jarrita, alderaketak egiteko. 

Egitasmo honetarako gogoan izan, Holandako Toxicowatch fundazioa eta Eusko Jaurlaritzak akreditaturiko Euskal Herriko enpresa bat kontratatu ditu Zubieta Lantzenek. Holandatik bi zientzialari izan ziren duela bi aste gure artean laginak hartzen. Lehenbizi Zubietako oilategi batean, "arrautzak, oiloek jaten duten pentsua, belarra, lurra eta inguruko goroldioa kutsadura aztertzeko". Baina "Zubieta herrian, Añorgan, Donostian, Usurbilen, Lasarten, Urnietan, Hernanin, Andoainen eta Zubietan, Realak entrenatzen duen lekutik eta ondoan dagoen Landaberri ikastolatik hurbil" ere laginak hartzekoak zituzten.

Datuokin txostena osatu eta hilabete gutxi barru emaitzak ezagutzera emango dituzte. Emaitzok erraustegia piztu aurreko egoera erakutsiko dute. 

Diru ekarpenak helbide honetan egin daitezke:
vkm.is/erraustegiarenkontrola

Informazio gehiago:

https://www.verkami.com/locale/eu/projects/24685-erraustegiaren-kutsadura-kontrol-independentea
erraustuez.org
Albiste honi atxikitako Errausketaren Aurkako Mugimenduaren bideoa.