Zubietan erraustegitik behera doan Arkaitz errekan larunbatean hilik agerturiko arrain eta aingiren auziarekin, Zubieta gaineko azpiegiturek zerikusirik izan dezaketenik ukatu du Gipuzkoako Hondakinen Kontsortzioak (GHK). "Gipuzkoako Ingurumen Guneko plantek ez dute ezer isurtzen ubideetara". Bai Tratamendu Mekanikoko Biologikoan, erraustegian, biometanizazio plantan eta eskoriak tratatzeko azpiegituran baliatutako ura zirkuitu itxi batean mugitzen da GHK-ren esanetan. Ur hauek arazketa sistema propioak dituzte, "kanpora ezer isuri beharrik izan gabe".
Eremu horretatik errekara isurtzen duen azpiegitura bakarra euri-uren biltegia da, bildutako euri-urak gainezka egiten duenean.
Ikerketapean
Larunbatean Zubietan izandako gertaera, Artzabaleta inguruko bizilagunek adierazi moduan, URA Uraren Euskal Agentzia ikertzen ari da. "Balizko isuri baten jatorria aztertzeko laginak hartu ditu zonaldean", GHK-k dioenez. Bere oharrean bada nabarmentzeko moduko esaldi bat; GHK-k dio aurrez antzeko egoerak gertatu izan direla eta kasu horietan eginiko ikerlanek argitu dute, isurien jatorriek Zubieta gaineko azpiegiturekin zerikusirik ez dutela izan. "GHK-k guztiz kolaboratuko du eta URA agentziari duen informazio guztia helaraziko dio, gertatu dena guztiz argitzen laguntzeko".
Zubietako erraustegia
Auzia ikerketapean egon arren, GHK-k ukatu egin du erraustegiak hildako arrainekin zerikusirik duenik
Gipuzkoako Hondakinen Kontsortzioak (GHK) ohartarazi duenez, Zubieta gaineko azpiegiturek erreketara ez dute ezer isurtzen. Euri-uren biltegia da soilik isuririk izan dezakeena GHK-ren esanetan, aipatu gordailuak gainezka egiten duenean. Aurrez "antzeko egoerak" jazo direla aitortzen du gainera GHK-k. Kontsortziotik argitu dutenez, asteburuko gertaera aztertzen ari da URA (Uraren Euskal Agentzia).