Zubietako erraustegia

Erraustegia eta espetxearekin batera, militarren kuartela ere Zubietan kokatuko duten argitzeke oraindik

Donostiak Zubieta gaineko bere lurretan du jarria begia hiriburutik urrun nahi dituen azpiegiturentzat. Erraustegia jada martxan da. Martuteneko espetxea ere bertara lekuz aldatuko dute; 2021eko bigarren hiruhilekoan hasi daitezke eraikitzen. Eta egunotan jakin denez, estatuaren jabetzako Loiolako militarren kuartelen lurrak 2021. urtean Donostiako Udalari saltzea adostu du EAJ-k Espainiako Gobernuarekin, Madrilgo aurrekontuak onartzearen truke. Hiburuko Udalak kuartela ere Zubieta gainean kokatzeko asmoa agertu izan du lehendik. Espainiako Gobernuak ordea, militarrak Donostian mantentzearen apustu argia egiten duen arren, ez du Zubietaren kokagunea guztiz babesten.

Zubieta gaika bildu zitekeen hondakinak erretzeko, Zubieta presondegiaren kokagune. Eta argitzeke oraindik, Zubieta militarren egoitza izatetik hurbilago ote dagoen. Espainiako 2021eko aurrekontuak babestea erabaki du EAJ-k Madrilen. Trukean, besteak beste, Loiolako militarren kuartela Donostiako Udalari eskualdatzea adostu dute. Urrats garrantzitsua izan daiteke honakoa hiriburuko Udalarentzat, kuartela lekuz aldatzeko.

Hiriburua hazi ahal izateko hain zuzen, bertako udalak eraikitzea aurreikusiak dituen etxebizitza proiektuak bere osotasunean gauzatu ezinean dabil, Loiolako militarren kuartelak eta Martuteneko espetxeak eragozten dielako. Martuteneko espetxeari dagokionez, badirudi datorren urteko bigarren hiruhilekoan eraikitzen hasi daitezkeela Zubieta gainean. Hura eraikita eraitsiko luteke egun zabalik den kartzela. Orain, bide bera jorratu dezake Loiolako militarren kuartelak. Espainiako Gobernuak Donostiako Udalari saltuko dio 2021ean kuarteleko lurren jabetza. Espainiako Gobernuko Defentsa Ministerioak kuartelok Donostiako lurretan kokatzen segitzeko asmo argia erakutsi du azken orduotan zenbait hedabideek berri eman dutenez. Donostiako lurretan bai baina orain arte ez da Zubieta gainean kokatzearen aldekoa izan, segurtasun irizpideengatik eta militarren “ongizate” arrazoiak argudiatuta.

Militarrak Donostian nahi ditu Madrilek, kokagunea zehazteke
Erraustegia Zubietan kokatu zuten; iazko azaroan probaldi fasean jarri zuten eta duela egun gutxi Gipuzkoako Foru Aldunditik adierazi dutenez, “normaltasun osoz” ari da lanean. Espetxea ere Zubietan kokatu nahi dute; 2021eko bigarren hiruhilekoan eraikitzen hasi eta 22 hilabeteko tartean amaitzea aurreikusten du Espainiako Gobernuak. Asteotan onar dezake Ministroen Kontseiluak kontratazio espedientea. 41 milioi euroko lizitazio aurrekontua izango du. “Norte 3” izeneko espetxeak 232 ziega bikoitz izango ditu.

Militarren kuartela ere Zubietan kokatuko duten argitzeke dago oraindik. Lehendik ere aukera “logikotzat” jo izan du alkate Eneko Goiak kuartela Estatuak Zubieta gainean lukeen lur eremura lekuz aldatzea, 2021eko bigarren hiruhilekoan eraikitzen has daitezkeen espetxearen ondora hain zuzen. Bere garaian, tamaina handiagoko kartzela bat zegoen proiektatua bertan, gero dimentsioz txikiagoa eraikitzea erabaki zen. Ondorioz, eremu horretan okupatu gabe geratuko litzatekeen zatian kuartela kokatzea balizko aukeretako bat litzateke Donostiako Udalarentzat. Espainiako Gobernuko Defentsa Ministroak argi du militarrak ez dituela Donostiako lurretatik mugituko baina orain arte behintzat, Zubietara lekuz aldatzeko aukeraren guztiz aldekoa ez da izan. Donostiako Udalak hainbat kokagune proposatu izan dizkio Espainiako Gobernuari; azkena, Belartza gaina. Aukera hau baztertu egin du Madrilek.