Zubietako erraustegia

"Zubietan gaur gertatzen ari dena oso larria da"

Noaua Aldizkaria 2022ko uzt. 13a, 17:49
Argazkia: Errausketaren Aurkako Mugimendua.

Zer ari den gertatzen, galdera hauxe egiten ari da orduotan, Errausketaren Aurkako Mugimendua, erraustegi ondotik igarotzen den Arkaitzerreka berriz ere kutsatua dagoela jakin ostean. Sare sozialen bidez zabaldu duten ondoko argazkiak argi erakusten duen moduan.

Gorritsu eta apartsu, irudi ikusgarria gaur Zubietako Arkaitzerrekan atera ahal izan dutena. Kutsaduraren argazki eta adibide argia. Gorritsu eta apartsu, horrelaxe zegoen goizean aipatu erreka. Asteazken arratsalde honetan oraindik begi bistakoa zen kutsadura. "Zubietan gaur gertatzen ari dena oso larria da", salatu du Erraustegiaren Aurkako Mugimenduak sare sozialen bidez. "Zenbait ordu igaro ostean, kutsadurak jarraitzen du ateratzen erraustegitik. Etenik gabe. Deskontrolatu zaie zerbait", gaineratu dute. 

Egoera honen aurrean, agintarien isiltasuna salatu dute. "Zer arraio gertatzen ari da?" galdetzen du aipatu herri mugimenduak. Eskaera argia egin dute. "Eman herritarroi azalpenak". 

Lagin bilketa
Jazotakoaren berri izanda, udaltzaingoa bertaratu da. URA Agentziako teknikariak ere bai, Erraustegiaren Aurkako Mugimendutik berri eman dutenez, zubietar batek deitu ostean. Antza, azaldu dutenez, mugimenduak lagina bildu eta gertatutakoa ikertzeko borondatea agertu ostean, aipatu agentziako teknikariek ere lagina bildu dute. Argitzeke dago, zer gertatu den gaur Arkaitzerrekan. Erraustegiaren Aurkako Mugimendutik diotenez ordea, "Arkaitzerrekan berriro ere agertu diren isurien aztarnak, 2009an Zabalgarbik izan zuen lisibiatuen isurketekin antzekotasun handia du. Orduan, Bilbo handira ur edangarria eramaten duen Ordunte kanaleraino iritsi ziren lisibiatuen kutsaduraren eraginak".