Aratz Mugerzak eta Xabier Zalduak ikuskizun ederra eskaini dute gaur arratsaldean Zubietan. Herri kiroletako pentatloia hurrenkera honetan osatu dute: harria altxa, aizkorarekin lau egur ebaki, 50 kiloko txingak eraman, plazari 20 buelta eman korrika eta, azkenik, 400 kiloko harriari tira egin behar izan diote, giza-proba estiloan.
Herri kirolekin osatutako pentatloia berri samarra da. Hainbat txapelketa jokatzen dira urtean zehar eta gaurko bi protagonistak onenen pare ibili ohi dira. Lehia estua izanik ere, lagun giroan aritu dira biak ala biak. Aurkezle lanak egin dituen esatariak esan duen bezala, kontrarioak eta lagunak baitira aldi berean.