Zubietako erraustegia

GuraSOS: "Aldundiak tranpa egin du datekin"

Noaua Aldizkaria 2022ko abu. 5a, 09:11

"Aldundiak tranpa egin du datekin", hala erantzun dio egunotan GuraSOSek Gipuzkoako Hondakinen Kontsortzioak (GHK) "Gurasosek egiten duen asmo txarreko manipulazioa salatzeko”, kaleraturiko azken oharrari. GHK-k GuraSOSek bere blogean kaleraturiko albisteari erantzun dio. "Bertan salatzen zen erakundeek bazekitela Gipuzkoako Ingurumen Konplexu delakoaren lurzoruaren eta lurpeko uren kutsadura larria zela".

GuraSOSek dioenez, GHK-ren "argitalpen horietan aipatzen den informazioak CMGren instalazioa martxan jarri aurreko datuak islatzen ditu; beraz, emaitzak ezin zaizkio instalazioaren jarduerari egotzi”.

Bost puntuko oharrean gogorarazi duenez, GHK-rena azken aldiko laugarren oharra da. "Zehatz-mehatz prestatutako nota horien garrantzia ez dago, ohikoa den bezala, esaten dutenetan, isiltzen dutenetan baizik. Ez dute daturik ematen, ez azalpenik ez informaziorik. Instalazio horien jarduera hasi zenetik, beti izan da gizarte zibila iritzi publikoari informazioa eman diona, eta inoiz ez du eman GHKk, ez Aldundiak, ez Ingurumen Sailak".

Honako galdera luzatu du GuraSOSek. "SGSren ikuskapen-eguna 2021eko ekainaren 16a bada, eta IDOM Lurzoru-laginak 2021eko irailaren 22a eta 23a eta ur-laginak 2021eko urriaren 13a. Nola esan daiteke emaitzak CMG1 abian jarri baino lehenagokoak direla?". Egoera honetan dioenez, "GHKk manipulatzen du, eragiketen benetako data ezkutatuz. Lanak atzeratuta zeudela salatzen zenean, manipulazioak zirela erantzuten zuten, eta TMB (Tratamendu Mekaniko Biologikoa) instalazioa 2019ko maiatzean aurrerapenarekin martxan jarri zutela harrotasunez onartzen zuten edota hondakinak erretzen hasi zirela 2019ko azaroaren 29an. Zubietako konplexuaren tratamendu biologikoko instalazioa (TMB) 2019ko apirilean hasi zen hondakinak jasotzen, eta 2019ko uztailaren 3an hasi zen “eraginkortasun osoz funtzionatzen”.

2019ko azaroaren 29an errauskailuarekin gauza bera egiten hasi ziren, Ingurumen Saileko Arriola jaunak eta GHK Asensio lehendakaria 2019ko azaroaren 22an egin zuten bisitan komunikabideei aitortu zioten bezala". GuraSOSek gogorarazi du, "2020ko martxoaren 2an, José Ignacio Asensiok baieztatu zuen 2019ko azaroaren amaieran “modu mailakatuan hasi zirela errekuntza saiakuntzak hondakinekin, bi lerro eta labeetan, eta “aldizkakoa”, baina “urtarrilaren hasieratik”, balorizazio energetikorako edo erraustegirako instalazioak hondakinak “etengabe” erretzen dituela jada. Asensiok zehaztu zuenez, “gaur egun batez beste 400 tona hondakin tratatzen ari da”, kantitate “oso indartsua”, modu “arruntean” funtzionatzen duenean 500 tona inguru erre baititzake".

Ingurumen Baimenaren eraginkortasuna 2020ko ekainaren 16ra arte ez zitzaiola eman  dioen arren, "egia da, halaber, TMBren proba gisa 2019ko apirilaren 24an hasi zela lanean eta 2019ko uztailatik aurrera funtzionatzen hasi zela. Errauskailuaren kasuan, probak 2019ko azaroaren 29an hasi ziren, eta etengabe funtzionatzen 2020ko urtarrilaren hasieratik hasi zen. Izan ere, amoniakoaren isurketa 2020ko maiatzaren 7an egin zen, baimena izan aurretik".

“Amaitu gabe dauden instalazioetan probak egiten aritu dira"
GuraSOSen oharraren bosgarren eta azken puntuan nabarmentzen dutenez, "Guardia Zibilaren SEPRONAren atestatuak isurketa hura ikertzen duten 991/20 aurretiazko eginbideetan honako hau adierazi zuen: “Amaitu gabe dauden instalazioetan probak egiten aritu dira, proiektuan diseinatuta eta aurreikusita dituen segurtasun-sistemarik gabe". GuraSOSen esanetan, "Guardia Zibilaren UCOMA aditu-unitateak nabarmendu zuenez, “deskribatutako hondakinak errausteko instalazio batek (...), probaldian ere, eskuragarri eta behar bezala funtzionatzen egon behar dute IBIren arabera poluitzaileak ez sakabanatzea bermatzen duten sistema zuzentzaile guztiek, pertsonen osasunari eta ingurumenari lotutako arriskuak saihesteko”.

Ikerketa haren arabera, "harrigarria da errauskailua 2019. urtearen amaieratik aktibo egon dela argi eta garbi onartzea, gasak arazteko beharrezko gehigarririk izan gabe. Hori dela eta, ondoriozta daiteke “badirela instalazioak lanean jardun duen bitartean kutsatzaileek ingurumenean eragin ditzaketen kalteak eta isurtzeko arriskuak. Hori dela eta, UCOMA delituzko zantzuak daudela ondorioztatzeko inguruabar horiek baloratzea komeni dela adierazten dio instrukzioko epaileari".