Ostalaritzako lehen goi-mailako ikasketa publikoak izango dira Gipuzkoan. Beste lurraldeetan ez bezala, Gipuzkoan orain arte sare publikoan ez da eskaini alor honetako ez erdi-, ez goi-mailako ziklorik, beraz arlo hauetan prestakuntza jaso nahi izan duten ikasleek sare pribatura edota beste lurralde batera jo behar izan dute. Oinarrizko Lanbide Heziketan bada eskaintza publikoa, hain zuzen Usurbil eta Pasaian, eta ibilbide horri eman nahi dio jarraipena eskaintza berriak.
Sukaldariak eta zerbitzariak badira ere ostalaritzan orokorrean ofizio ezagunenak, askoz ere zabalagoa da sektore honen lan esparrua. Zubietan eskainiko den zikloak jatetxe baten kudeaketa du helburu: bezeroen arreta, menuen elaborazioa, maître eta sommelier lanak, hornitzaileen kudeaketa… jatetxe baten martxa egokia bermatzeko behar diren gaitasunen lanketa, azken batean. Sare publikoa hornitzeko menu berria, baina orain arteko sustraiak galdu gabe, erronketan oinarritutako prestakuntza, talde lana eta gaitasun pertsonal eta profesionalen garapena bilatzen du.
Informazio gehiago www.lhusurbil.eus web orrian edota 943 364 600 telefono zenbakian.