Gipuzkoako Batzar Nagusiek iragarria dutenez, ostiral honetan, azaroaren 17an bi agerraldi eskaera programatuak daude goizeko 9:00etan, batetik Elkarrekin Gipuzkoak eta, bestetik, PP-k aurkezturikoa. Biek ala biek jasangarritasun departamenduko foru-diputatua agertzea galdegin dute, Jose Ignacio Asensio alegia. Zuzenean eskainiko dituzte bi agerraldiok Batzar Nagusiek, sarean duten web orrialdetik. Elkarrekin Gipuzkoako ordezkari Miren Etxebestek sinaturiko eskaerak dioenez, beharrezkotzat eta urgentetzat jotzen dute Asensiok gipuzkoarren ordezkari politikoen aurrean azalpenak ematea, Donostiako auzitegi batek lehenago aipaturiko ustezko delituengatik bera ikertzea erabaki ostean.
Erabaki horrek "foru erakundeen irudia" larriki kaltetzen duela ohartarazi dute eta horrek beharrezko egiten duela jasangarritasun arloko foru diputatuaren agerraldia.
Ildo beretik, PP-k ere Asensiok gipuzkoarren aurrean azalpenak ematea eskatu du aipatu gai beragatik. "Duela gutxi jakin ditugun inputazioen larritasuna dela-eta, eta akusazio horien oinarri den karguaren garrantzia dela-eta, gardentasunez egin behar da agerraldia batzordean, inputatuak ordezkatzen duen foru-erakundearen duintasuna eta eredugarritasuna babesteko behar diren azalpenak emateko", dio popularren taldeko bozeramaile Mikel Lezamak sinaturiko agerraldi eskaerak.
"GuraSOS plataformak Zubietako erraustegiaren funtzionamenduagatik jarritako salaketa baten esparruan, Gipuzkoako Fiskaltzak eskatuta, Gipuzkoako hondakinen partzuergoko lehendakari eta Gipuzkoako Jasangarritasuneko foru-diputatu José Ignacio Asensio ikertuko dute, ustez ingurumenaren aurkako delitu bat eta dokumentuak faltsutzeko beste delitu bat egiteagatik. Ohiko prozeduraren paralelo litzatekeen inolako epaiketarik egin nahi izan gabe, eta aldez aurretik inolako erruduntasunik ezarri gabe, José Antonio Asensio foru diputatuak duen karguaren garrantzia eta egozten zaizkion egozpenen larritasuna kontuan hartuta, premiazkotzat jotzen dugu egokitzat jotzen dituen azalpenak ematea, ordezkatzen duen erakundearen duintasuna eta eredugarritasuna zaintzeko", gaineratu du Lezamaren idatziak.
GuraSOSen agerraldiaren ondotik
Gai berari lotuta, GuraSOSek asteazkenean eginiko agerraldiaren ondotik datoz gaurko iragarriak daude beste biak. Eskaera Elkarrekin Gipuzkoak aurkeztu zion Jasangarritasun Batzordeari, "urgentziaz GuraSOSeko ordezkarien agerraldia antola dezaten". Hitzordu hau, Donostiako epaitegi batek Jose Ignacio Asensio alor horretako Diputatua ikertzea erabaki ostean zetorren. "Hedabideek argitaraturiko informazioaren harira jakin dugu Donostiako epaitegiak tramitera onartu duela Gipuzkoako Fiskaltzaren eskaera Jasangarritasun diputatua eta Ahaldun Nagusiaren ordezkoa ikertzeko, ustezko ingurumenaren aurkako delituagatik eta dokumentuak faltsutzeagatik".
Horren aurrean, Elkarrekin Gipuzkoak agerraldi honen eskaera jasotzen duen dokumentuan dioenez, "Donostiako epaitegiak Jasangarritasun arloko diputatua ikertzeko hartutako erabakiak izan duen oihartzun sozial handia tarteko, beharrezkoa ikusten dugu GuraSOS elkarteak urgentziazko agerraldia egitea Batzar Nagusietan bere iritzia azal dezan Gipuzkoako gizartearen ordezkarien aurrean".
Agerraldi hau antolatzea beharrezko ikusten zuen Elkarrekin Gipuzkoak, izan ere, "kasu honen ardura duen epaileak irekitako aurretiazko diligentziak foru erakundeen irudiaren gainbehera larria suposatzen du. GuraSOS elkartea osasunarekin inplikatua dago eta irekia dagoen auzi honetan parte hartzen ari da herri akusazio gisa. Beraz, beharrezkoa da Jasangarritasun Batzordean azalpenak ematea".
"Neure gain" bonuak
Gogoan izan, GuraSOS herri akusazio gisa agertu da auzi honetan. GuraSOSek jakinarazi duenez, ordea, "Jose Ignacio Asensiok GuraSOSen kontuak enbargatuta utzi ditu beste auzi batzuetako kostak ordaindu ez dituelako". Horregatik, "nire gain" bonuak eskuragarri jarri ditu NOAUA! K.E.-ren egoitzan eta Aitzaga tabernan. Albiste honetan beherago duzue baita eskuragarri. Ekarpen ekonomikoa egin nahi duenak bonu horietako bat datu pertsonalekin bete, tartean helbide elektronikoa idatzi eta "bertara helduko zaizu gero mezu bat "argituz zeinen kontuan egin beharko duzun diru sarrera, hau da, eskaini duzun laguntza ekonomikoaren kopurua eta jasoko duzu diru hori zertan gastatu den egiaztagiria". Diru ekarpenak norbanako gisa edo taldean egin ahalko dira.
Zubietako erraustegia
Jose Ignacio Asensioren bi agerraldi eskaera gaur Batzar Nagusietan
Zubietako erraustegiaren funtzionamenduari lotuta ikertua izaten ari da Jose Ignacio Asensio foru ingurumen diputatua, ustezko bi delituengatik. Gai horren harira GuraSOSek agerraldia egin zuen asteazkenean Gipuzkoako Batzar Nagusietan. Ostiral goiz honetan, Elkarrekin Gipuzkoak eta PP-k Asensio beraren agerraldia eskatu dute Jasangarritasun Batzordean, azalpenak eman ditzan.