[IRUDITAN] "Aste Nagusi" bizi askoa izan zuten Zubietan Herri Jaiekin

Uztaila amaiera girotua bizi izan zuten Zubietan astebetez luzaturiko Herri Jaiekin. "Herritik eta herriarentzat lanean diharduen herritar oro" goraipatuta ekin zioten festei abuztuaren 24an, ospakizunen sustatzaile izandako Jose Luis Martijak jaurtitako txupinazoarekin.

Berehala bildu ziren zubietarrak mozorroturik frontoiko herri afarian. Festen azken txanpan ere antzeko hitzorduan bildu ziren; kasu hartan, urte luzeetako uztailaren 31ko bazkaria bezperako Gaupasa Eguneko afari bilakarazitako zikiro janean.

Ordura arte, soka-dantzara lotu ziren. Zubietarrak desafiyuan, segan, musean, lehiatu ziren.

Biran irten ziren oilasko biltzaileekin, lasterka Andatzarantz bigarrenez eginiko igoerarekin. Erronka gehiagorako tarterik izan zen Zubietako Herri Jaietan gaztetxoen arteko Yoko Garbi erakustaldiarekin edota zubietarren arteko errebote partidarekin. Indarberritzeko ez zuten jan-edanik falta izan piper, sardina edota tokiko sagardo dastaketekin.

Txokolate gozoa ere dastatu ahal izan zuten jolas eta tailerrekin ederki hornituriko Umeen Egunean. Lauburu konpartsak eginiko birak borobildu zuen egun hura; beste hiru jaiegun, goizaldera arte luzaturiko kontzertu gauek.

Uztailaren 24tik 31ra Zubietan ospaturiko Herri Jaiekin esteka honetako irudi-bilduma osatu genuen: https://noaua.eus/bereziak/zubietako-jaiak-2026