Gizarte larrialdietarako laguntzei buruzko informazio erabat argigarria argitaratu du Usurbilgo Udalak, "Udalberri" aldizkariarekin batera etxez etxe banatu duen eskuorriarekin.
Aldian-aldian ematen diren prestazio ekonomikoak dira gizarte larrialdetarako laguntzak Udalaren esanetan. "Bizitzaren gorabeherak medio, hainbat momentutan, ezohikoak diren dirulaguntzen beharra izan dezakegu: horri erantzuten diete laguntza hauek". Helburu argi batekin; "gizarte bazterkeria egoerak saihestea edo leuntzea".
Laguntza hauen hartzaileak "beharrezko diren gastu espezifikoei-ohikoak zein apartekoak- aurre egiteko behar beste baliabide ez dituzten pertsonak dira". Eskaerak udaletxean edo gizarte zerbitzuetan bideratu behar izaten dira.
Laguntza hauen onuradunak izateko bete beharreko baldintzak:
-Gastu espezifikoei aurre egiteko behar beste baliabide ez izatea.
-Eskaera egiten den udalerrian erroldatua egotea eta EAEko edozein udalerritan gutxienez 6 hilabeteko errolda izatea.
-18 urtetik gora izatea.
-Bizikidetza unitatea eskabidea aurkeztu baino urtebete lehenago sortutakoa izatea.
-Laguntza alokairu gastuei aurre egiteko erabiltzen denean, Etxebiden izena emanda egotea (baldintza hau une batzuetan ez da beharrezkoa).
-Inolako ahaidetasun-harremanik ez egotea etxejabearen eta maizterraren artean.
-Bere diru-sarrerak/ondarea muga hauen azpitik egotea.
Diru-laguntza aukera:
-Alokairu gastuetarako: 250 euro gehienez hilero, urtean gehienez 3.000 euro.
-Gizarte larrialdiko egoera baino lehenagoko etxebizitza edo bizitokia erosteko kredituen interesen eta amortizazio gastuetarako: 250 euro gehienez hilero, 3.000 euro gehienez urtean.
-Energia gastuetarako (argindarra, gasa edo etxerako beste erregai-horniketa batzuek eragindakoak): 75 euro gehienez hilero, 900 euro gehienez urtean.
-Oinarrizko etxetresna elektrikoen edo altzarien gastuetarako: gehienez 1.850 euro.
-Etxebizitza egokitzeko, konpontzeko eta/edo oinarrizko instalazioak egiteko: gehienez 1.850 euro urtean.
-Ohiko etxebizitza/bizilekua mantentzeko beharrezkoak diren beste gastu batzuetarako (ondasun higiezinen gaineko zerga, jabekideen erkidegoaren kuotatik eratorritako gastuak, edo etxebizitzaren asegurua): 75 euro gehienez hilero, 900 euro gehienez urtean.
-Oinarrizko premietarako: jantziak, hezkuntza eta prestakuntzakoak, osasun-arretakoak... 1.850 euro gehienez urtean.
-Zorpetze gastuetarako: 1.805 euro gehienez urtean, kontzeptuaren arabera, gehienez 3.000 euro.
Informazio gehiagorako:
Kale Nagusia behea, 43
943 377 110
gizarte-zerbitzuak@usurbil.eus
Bizi dugun osasun krisialdiari aurre egiteko gizarte babesa indartzeko apustua egina du Usurbilgo Udalak, berriki jakinarazi zuenez. Besteak beste, 2020ko udal aurrekontuetan arlo honetara bideratu asmo zuen 90.000 euroko diru partida beharko balitz handitzea aztertu asmo du, azken asteotan 30 familiek jaso duten oinarrizko elikadura bermatzeko ezohiko bidetik eskainitako diru-laguntza etorkizunean ohiko bidetik eskaintzea... Gizarte larrialdietarako laguntzen inguruko informazioa Gizarte Zerbitzuetara deituta jaso daiteke, edota Udalak egunotan etxez etxe banatu duen eskuorriaren bidez.
Erlazionatuak
Gizarte babesa indartzeko apustua
2020 mai 18 Usurbil