Urte zaila izan da haientzat; udaberrian bat-batean inoiz bizi gabeko konfinamenduari egin behar izan zioten aurre. Etxetik irten gabe igaro zituzten bi hilabete. Jarrera ezin eredugarriagoa erakutsi zuten hilabete haietan eta baita gerora ere, ezohiko 2020-21 ikasturtea hasi zenetik ere. Prebentzio neurriak ezin egokiago barneratuak dituzte eta zorrotz betetzen dituzte gainera.
Ostiral honetan borobildu dute ikasturteko lehen hiruhilekoa Udarregi Ikastolako ikasleek; neguko oporretara doaz gaur urtarrilaren 7ra arte. Azken klase orduetan, pizgarri gisa, aurreko urteetako tradizioari hutsik egin gabe kantatzera irten dira herrira HH eta LH-ko ikasle eta irakasleak. Ditxosozko pandemiaren eraginez, ohiko baserritar jantziekin batera, eguneroko janzkeraren osagarri bilakatu zaien musukoak jantzita aritu dira kantuan; taldeetan banatuta. LHko lehen hiru mailakoek 9:30ak pasatxoan hasi dute kantuari eskainitako goiza Artzabalgo frontoian; LHko gainerako hiru mailetako ikasleek gauza bera egin dute ordubete beranduago herri erdiguneko frontoian. HH-koek borobildu dute goiza, Usurbilgo Udalak Olentzeroa kokatua duen Mikel Laboa plazan.
Tabernariekin elkarlanean
Araudiak dioenarekin bat eginez 6 urtera artekoek ez baina gainerakoek bai, musukoak jantzita aritu dira kantuan. Aurtengo saioek berezitasun gehiago ere izan dituzte; publikorik gabe ospatu dira eta ez dute ikasle helduenek prestaturiko ohiko txistor janik izan.
Pandemia bera alternatiba sortzaileen iturri ere izaten ari da hilabeteotan; gaurkoan beste adibide bat; Ikastola eta herriko tabernariak batu dituena. DBH-koek ezin txistorrik prestatu gainerakoentzat. Hamaiketako goxoa prestatu diete ordea garai zailak bizi dituzten tabernariek.
Gaurko kantu saiook ospatzeko Udarregi Ikastolakoen ahalegina azpimarratu beharra dago beste behin.