"Hiri Antolamenduko Arau Subsidiarioetako A-78 (Zapategi) eremuko hirigintza ezaugarrien Aldaketa Puntuala sustatzeko Michelin España y Portugal S.A., Gureak Lanean S.A., Balfer Norte S.L. eta Usurbilgo Udalaren artean izenpetu beharreko Hirigintza Hitzarmena hasierazko izaeraz onartzea" erabaki dute irailaren 30eko udalbatzarrean. 20 eguneko alegazio epea zabalduko da laster, Udalak erabaki honen iragarkia Gipuzkoako Aldizkari Ofizialean argitaratu ostean.
Hirigintza hitzarmen honi buruzko xehetasunak duela astebete aurkeztu zituzten sustatzaileek agerraldi bidez. Hirigintza hitzarmen berriak duela hiru urtekoa, 2018ko urrian Elkar, Michelin, Gureak eta Udalak sinaturikoa ordezkatuko du. Gogoan izan, covid19ak mundua kolpatu zuela iaz, baita beste alorren artean, euskal kulturgintza ere, tartean Elkar. Zapategira ekartzekoa zuen egoitza, baina ezohiko testuinguru zailak inbertsio txikiagoa egitera behartu eta lantegia Adunan kokatzea erabaki zuten.
"Eremu degradatua berrerabiltzeko apustua"
"Kinka larrian" jarri zuen aldaketa honek Michelin ondoko eremuko proiektua. Lankidetzari esker ordea, alkateak ostegun honetako udalbatzarrean zioenez, "urtebeteko epean eta garai ziurgabe honetan, gai izan gara proiektu industrial honi eusteko". Gureak-en "ahalegin itzelari" esker, bidelagun berria aurkitu dute; Andoaingo Illarramendi industriagunea garatzeaz arduratzen ari den Balfer inbertsorea.
115.000 metro karratuko azaleran, batetik Michelinek 70.000 metro karratuko eremua hartuko du bere jarduna finkatzeko, eta gainerako ia 50.000 metro karratuetan kokatuko dira Gureak eta Balfer inbertsoreak erakarri dezakeen enpresa(k). Erabilera industrialerako gune honetan, kontuan hartu nahi izan dute, pertsonen joan etorrirako eremua izatea, genero nahiz irisgarritasun ikuspegiak txertatu dituzte, baliabide naturalak balorean jarri nahi dituzte. "Proiektu hau, eremu degradatua berrerabiltzeko apustua" izango da.
Hirigintza hitzarmen hau Usurbilgo herriarentzat diru-iturri garrantzitsua izango da; %15a Udalak eskudirutan jasoko duela berri eman dute ostegun honetako udalbatzarrean, 862.000 euro guztira. Proiektuaren onurak haratago doaz, 700 lanpostu (gehienak lekuz aldaturikoak) erakarriko baitituzte Zapategi eremura.
2023. urte hasieran eraikitze lanen baimena emateko moduan egotea aurreikusten dute. Ordura arte, egitasmo honen garapenerako kronograma bat finkatua dute. "Presa du, ezin dugu denbora gehiago galdu", zioen alkateak ostegun honetako udalbatzarrean.
Gureak lantegia eta Balfer inbertsorea Michelin ondora, Zapategi lur eremura erakarriko dituen egitasmoa gauzatzeko, astebete lehenago prentsaurreko bidez aurkezturiko hirigintza hitzarmena hasieraz onartzea erabaki dute ostegun honetako udalbatzarrean.
