Udalbatzarra

Kafe Tertuliak plazaraturiko bizipen eta erasoak udalbatzarrera heldu dira

Pandemia aurreko Martxoaren 8ko ekitaldien artean, frontoian egin zuten hausnarketa saioa.

Emakumeenganako Indarkeriaren Kontrako Egunez gai honi lotutako mozioa onartu zuen aho batez udalbatzak ostegun honetan, azaroaren 25ean egokitu den osoko bilkuran. Besteetan egin ohi duten moduan, bozkatu aurretik oraingoan ez dute onartzera zihoazen mozioa irakurri. Horren ordez, atzo frontoi inguruan entzungai ziren lekukotza larriei ahotsa eman zitzaien udalbatzarrean. Usurbilgo Kafe Tertuliako kideek herriko emakumeek pairatutako erasoen eta bizipenen lekukotzak biltzen aritu da azken egunotan. Bildutakoak 10 minuturainoko audioa osatzeko eman die. Udal gobernu taldeak entzungai jarri zuen audioa osoko bilkuran. Hunkidura, amorrua adierazi zuen alkateak baina era berean harrotasuna baita, herriko emakumeon lekukotzak "plaza publikora ateratzeko agertutako ausardiagatik". Kafe Tertuliak argitara emandakoak "zer indarkeri mota asko dauden normalduak" islatzen du Agurtzane Solaberrietaren esanetan. Eta honenbestez, "zer nolako lana dugun oraindik, libre eta beldurrik gabe ibili ahal izateko". Lerrootan, udalbatzak aho batez onarturiko adierazpena osorik.

AZAROAREN 25ERAKO ADIERAZPENA, 2021EKO EMAKUMEEN AURKAKO INDARKERIAREN AURKAKO EGUNA DELA ETA
Emakumeen aurkako indarkeria larderiarako tresna indartsua da, emakumeei zuzendua, indarrean dauden genero-arauak desafiatu eta eralda ez ditzaten. Mehatxurako tresna hori zuzenean emakumeengan erabiltzen da, baina baita haien gertuko pertsona maitatuenengan ere, min handiagoa sortzeko modu gisa. Kalkuluen arabera, bikotekideen edo bikotekide ohien eskutik indarkeria jasaten duten EAEko hamar emakumetik seik seme-alaba adingabeak dituzte, eta horiek ere biktima bihurtzen dira.

Indarkeria bikarioa esaten zaio emakumeari, hirugarren pertsonak baliatuz, kalte psikologiko handiena eta larriena eragiteko egiten zaion biolentzia motari, zeinak ankerkeria-maila gorena lortzen duen haien erailketarekin (seme-alabak, ama, aita, egungo bikotekidea...). Istanbulgo Hitzarmenean ezarritakoa aplikatuz, kasu horiek ere genero-indarkeriaren parte gisa ulertzen dira, seme-alabei egindako kalteak erasotzaileek emakumeei tratu txarrak transmititzeko tresna bihurtzen diren heinean.

Azken lege-aldaketek dagoeneko jasotzen dute figura hori, biktima adingabeak babesteko neurriak sortzeari eta hedatzeari dagokionez. Hala ere, oraindik ere beharrezkoa da genero-indarkeria ukatzen duten, kasu horietan seme-alaben arriskua gutxiesten duten eta indarkeria horri aurre egiteko tresna juridikoak zalantzen jartzen dituzten diskurtsoen eta jarreren aurka ohartaraztea. Jarrera horiek adingabeen eta emakumeen birbiktimizazioan eragiten dute, haien salaketak susmopean jartzen dituzte, amak zigortzen dituzte, haien testigantza gutxiesten dute eta aitaren guraso-ahalaren eskubidea babesten dute, emakumeen eta adingabeen segurtasunaren eta indarberritzearen gainetik.

Emakumeen aurkako indarkeria beren seme-alaben bidez sistematikoki egikaritzeko modu horren aurrean, bai eta emakumeak kontrolatzeko, hertsatzeko eta kaltetzeko modu guztien aurrean ere, euskal erakundeok indarkeria horri aurre egiteko erantzukizuna dugu, kontuan hartuta ez direla gertakari isolatuak, egiturazko desberdintasun-egoera bati erantzuten diotela, eta egoera horri ikuspegi feministatik heldu behar zaiola.

Horregatik, Usurbilgo Udalak honako konpromiso hauek hartu nahi ditu:
-Gutariko bakoitzari dagokigu egoera hori aldatzea. Horregatik, Usurbilgo Udaletik lanean jarraituko dugu beharrezkoak diren baliabide tekniko, ekonomiko eta politikoak bideratzen, alde batetik, udaleko Berdintasun Saila indartuz, eta, bestetik, emakumeen parte-hartzerako guneak sustatuz, hala nola Emakumeen Etxea, ahalduntze-eskolak, jai parekideak eta abar.
-Indarkeria bikarioaren errealitate hori agerian jartzen eta behar bezala artatzen laguntzea, besteak beste, Istanbulgo Hitzarmenak jasotzen dituen indarkeria-bideen biktima adingabeak koordinazio protokoloetan eta indarkeria matxistaren biktimak artatzeko protokoloetan txertatzea eta protokolook eguneratzea.
-Indarkeria matxistaren biktima diren adingabeak hautematen eta esku-hartze goiztiarra egiten laguntzea, udal-zerbitzuen bidez, beste eragile batzuekin lankidetzan (hezkuntza-, osasun- eta polizia-agenteak...) eta emakumeek beren ardurapean dituzten adingabeekin eta kaltetutako beste pertsona batzuekin behar dituzten beharrei eta baldintzei erantzutea.
-Indarkeria matxistaren biktima diren adingabeak babesteko eta esku hartzeko prozesuak hobetzea, beren eskumenen esparruan, ikuspegi feminista duen sektore arteko abordatze integral eta holistikotik.
-Neurri guztien erdigunean jartzea biktimen eskubideak eta haien ahalduntzea, eta laguntza integrala ematen laguntzea, prozedura judizialarekin duten inplikazio- edo lankidetza-maila edozein dela ere.
-Toki-administrazioko langileak berdintasunari buruzko prestakuntza jaso dezaten bultzatzea, bereziki emakumeen aurkako indarkeria matxistaren aurrean erantzuten diharduten langileei, genero-ikuspegia eta giza eskubideen ikuspegia aintzat hartuz.
-Lanean jarraitzea berdintasunaren aldeko eta emakumeenganako indarkeriaren aurkako, eta, ondorioz, haien seme-alaben aurkako, herri-itun bat lortzeko, herritar guztien jarrera aktiboa behar dugulako indarkeria matxistarik gabeko gizarte bat lortzeko.

Herritarrei gogorarazi nahi diegu indarkeriaren biktimei laguntzeko baliabideen sarea eskuragarri dagoela, besteak beste, SATEVI (900 840 111) indarkeriaren biktima diren emakumeentzako telefono bidezko arreta-zerbitzuaren eta Zeuk Esan (116 111) haur eta nerabeentzako telefono eta online orientazio-, aholkularitza- eta informazio-zerbitzuaren bidez.

Era berean, herritarrei dei egiten diegu azaroaren 25ean bat egin dezaten Emakumeenganako Indarkeriaren Aurkako Nazioarteko Eguna dela-eta deitutako mobilizazioekin.