2027ko ordenantza fiskalak hizpide, udalbatzaren gaurko ezohiko osoko bilkuran

Azken urteotan, urria hasiera helduta egiten ari diren moduan, ezohiko osoko bilkura egingo du udalbatzak asteazken honetan, hilaren 7an, arratsaldeko 18:00etan. Izan ere, udazken honetan egokituko da, 2027. urteko udal aurrekontuak landu, aurkeztu, ekarpenak bildu eta onartzea. Horien aurretik, ordea, urte berrirako Usurbilgo zerga, tasa eta prezio publikoak arautzen dituzten ordenantza fiskalak onartzea dagokio udalbatzari. Onespen bide horri hasiera emateko deitu dute asteazken honetako ezohiko osoko bilkura.

Zuzenean eta bideo-aktak
Gogoan izan, iazko udaz geroztik egiten ari diren moduan, udalbatzaren osoko bilkura hau ere zuzenean jarraitu ahalko duzue Usurbilgo Udalak Youtuben duen @usurbiludala4589 kanalean. Bertan jasoak geratzen dira zuzeneko emanaldi horiek. Gerora, usurbil.bideoaktak.eus atarian ere ikusi ahalko dituzue saio horren eta datozenen bideo-aktak ere. Izan ere, "kide anitzeko organoen funtzionamendu elektronikoaren ordenantzari eta Udala, gertu misioari jarraiki", osoko bilkuren digitalizazioan urrats berria eman du Usurbilgo Udalak Goienaren laguntzarekin: bideo akten tresna martxan jarri dute. Hala, aurrerantzean, "osoko bilkurako edukiak sailkatuta" ikusi ahalko dira, "puntuka eta bakoitzean parte hartzen duten hizlariak zehaztuta, eta, horrekin batera, lau hizkuntzatan azpititulatuta", aipatu usurbil.bideoaktak.eus atarian.

Urrian, tasa eta zerga bana
Gogoan izan, indarrean dira urtarrilaren 1az geroztik, 2026. urte honetarako Usurbilgo Udalak onarturiko zerga, tasa eta prezio publikoak. Horiek ordaintzeko egutegi fiskala ere onartua du Udalak. Egutegi horri erreparatuta hain zuzen, asteroko merkatua egiteko bide publikoa erabiltzeari lotutako hirugarren hiruhilekoko tasa nahiz ekonomia jarduerei lotutako zerga ordaintzeko hilabetea da honako hau, Udalak irailaren 29ko Gipuzkoako Aldizkari Ofizialaren eta urriaren 6ko Gipuzkoako Aldizkari Ofizialaren bidez jakinarazi zuenez hurrenez hurren.

Bien erroldak ikusgai daude udal kontuhartzailetzan. Biak ordaintzeko borondatezko epealdia azaroaren 2ra artekoa izango da, Udalak aurtengorako onarturiko egutegi fiskalak zehaztu moduan.

%3a
Ordenantza fiskalen bidez, "helburua bada, diru-sarrera horien bidez herritarrei ahalik eta zerbitzu publiko onena eskaintzea, herritarren beharrak eta udalaren diru-sarreren arteko finantza oreka bermatuz". Horrekin batera, bitarteko gisa ikusten du ordenantza hori udal gobernu taldeak, "Usurbilerako dauzkagun helburuak lortzeko; Usurbil berdinzaleagoa, bizigarriagoa eta jasangarrigoa eraikitzen jarraitzeko" hain zuzen.

Irailean hasten dira lantzen ordenantza fiskalok. Honenbestez, aurreko hilabeteko EAE-ko KPIa-ren zenbatekoa hartzen dute erreferentzia gisa urtero. Uztailekoa hartu dute kontuan, lantzen hasi zirenean abuztukoa argitaratzeke zegoelako, udal gobernu taldetik urriaren 8ko osoko bilkuran argitu zutenez.

2026ko Usurbilgo zerga, tasa eta prezio publikoen igoera orokorra %3koa izango da. Halere, aurreko urteen antzera, zenbait salbuespen izango dira. Esteka honetan dituzue xehetasunak: 2026ko ordenantza fiskalen behin-behineko onarpena.