"Usurbil, herri zaintzailea" izeneko ekitaldi berezia, abian diren eta martxan jarriko diren hainbat egitasmo aurkezteko baliatu dute larunbat honetan Sutegin. Haietako bat, Usurbilen bizi direnak gure artera etorritakoekin hartuemanetan jartzea ahalbitzen duen HarEman proiektua duzue.
Duela bi urte estreinakoz abiarazitako egitasmoa berriz martxan jartzea erabaki zuen Udalak, hilabete hasieran eginiko prentsaurreko bidez iragarri bezala. Hitzordu hartan hitza hartutako bikote parte hartzaileetako bat gonbidatu dute larunbat honetan, Sutegiko oholtza gainera; Lina Rincon eta Prexen Egileta.
HarEman abiarazitako une beretik izena eman eta elkar ezagutzen hasi ziren biak. Gainerako hamar bikote inguruk egin bezalaxe, haien kasuan, herria ezagutzetik hasi zuten hartuemana. Astearte goizetan, "Usurbil, goazen kalera" paseo osasuntsuen ekimenean ere parte hartzen hasi ziren. "Niretzat garrantzitsua da Linaren integrazio komunitarioa", azaldu zuen Prexenek. Bera zubi modukoa izan da Linak herrikide gehiago ezagutzeko. "Beste ikuspegi batekin ikusten dute nirekin. Jada jende asko ezagutzen du", Prexenen esanetan.
"Asko eman dit"
Oso esperientzia polita izaten ari dela gaineratu zuen Prexenek. "Berak asko eman dit. Bere bizimodua, ohiturak... irakatsi dizkit". Bizipen aberasgarria dela dio HarEman. Iazko ikasturte amaieran parte hartzaile guztiek batera eginiko topaketa ekarri zuen gogora. Mokadutxo hartan, "hamar herrialde zeuden mahai horretan. Bakoitzak bere janaria, bere bizipenak ekarri zituen. A zer nolako aberastasuna zegoen mahaiaren bueltan", Egiletak oroitarazi zuenez. Horregatik, bere esanetan, "proiektuak segi behar luke denbora askoan, merezi du eta".
Ildo beretik mintzatu zen baita Lina. Kolonbiatik heldu zen duela bi urte gure artera. HarEman berarentzat aukera ederra izan da, iritsi berritan herria eta herrikideak ezagutzen hasteko. Prexen ezagutzeko aukera izan du, besteak beste, "guretzat laguntza eta babes handikoa" izan dela zioen Sutegiko ekitaldian. "Guri harrera egitea ahalbidetzen duen proiektu bat da" bere esanetan. Izan ere, "migratzea oso zaila da. Hizkuntza, ohiturak, harremantzeko era, lan egiteko modua... gurearekiko oso desberdina da". Horregatik, HarEman-en bidez, "ikasketa handiko bi urte" bizi izan dituela gaineratu du eta ikasketa prozesuan jarraitzen duela, esker ona adieraztearekin batera. Bera bezala, gure artera datozenak egitasmo honetan parte hartzera gonbidatu ditu.
