Iazko erraustegiaren aurkako martxan auziperaturikoen aldeko elkarretaratzea 11:00etan, Donostiako epaitegi atarian

2018ko irailean Zubietako errausketaren zero gunera eginiko martxa.

2018ko irailaren 23an Zubietako errausketaren zero gunera egin zen martxaren harira lau lagun-tartean bi zubietar- epaituko dituzte asteotan. Errausketaren Aurkako Mugimenduak mobilizatzera deitu du. Lehen hitzordua asteazkenean, abenduaren 4an, 11:00etan Donostiako epaitegian.

Epaituak izango diren lau lagunak Ertzaintzak salatu zituen. Gogoan izan, Ertzaintzak jarrera oldarkorra erakutsi zieten erraustegiaren aurkako martxan modu baketsuan parte hartzen ari zirenei. Guztiona den mendi bideak itxi eta guztiz jarrera baketsu eta aldarrikatzailea adierazten ari ziren manifestarien aurka indarrez jo zuen. Zaurituak izan ziren. Lurrez nahiz airez kontrolatu zuen poliziak martxa osoa. Kamerez grabatu zituzten manifestariak. 

Hau gutxi ez eta lau lagun salatu zituen Ertzaintzak. Desordena publikoak eragin izana egozten zaie. Eta salaketa haien harira dator lau lagunen aurkako epaiketa orain. Bi zubietar, lasartear bat eta donostiar bat epaitegira deitu dituzte abenduaren 4an, 9an eta urtarrilaren 9an. Egunotan herritar hauei babesa adierazi eta protesta sozialen aurkako epaiketak salatzeko elkarretaratze bana deitu du Errausketaren Aurkako Mugimenduak, Donostiako epaitegi atarian bertan. "Gure elkartasun osoa beraiekiko eta mespretxu osoa, klima aldaketaren aurka daudela esan arren, Gipuzkoako gune kutsatzailerik handiena izango dena inposatzeko egin ahalak eta bi egiten ari diren EAJ eta PSEko agintariekiko", adierazi du aipatu herri mugimenduak ohar bidez.

Epaiketa jauzi kualitatibotzat jotzen du Errausketaren Aurkako Mugimenduak, "erraustegiarekin loturiko aktibismo soziala epaitegietara eraman nahi dutelako lehen aldiz (ez dugu ahazten erraustegiaren proiektua gelditu zuten arduradun politikoen aurkako epaiketak sustatu izan dituztela, Ainhoa Intxaurrandieta eta Iñaki Errazkinen aurka mafia baten gisa jokatuz)". Epaiketa honekin "herritarrok beldurtu nahi gaituztela" ondorioztatzen du Errausketaren Aurkako Mugimenduak. Baina argi diotenez, "ez dute lortuko, ez gaituzte kikilduko".

Lau herritarrak epaituak izango diren hiru egunotan deitu dituzte mobilizazioak Donostiako Egiako epaitegi atarian:
-Abenduaren 4an, asteazkena: 11:00etan.
-Abenduaren 9an, astelehena: 10:30ean.
-Urtarrilaren 9an, osteguna: 10:30ean.


Hemen lau lagunen aurkako epaiketaren harira Errausketaren Aurkako Mugimenduak plazaratu duen oharra bere osotasunean:

ERRAUSKETAREN AURKAKO MUGIMENDUA
Iazko irailean erraustegira egin genuen martxan parte hartu zutela egotzita lau pertsona epaitegira deitu dituzte Ertzaintzaren salaketaren ondorioz. Ia 2.000 lagunek parte hartu genuen protesta harekin desordena publikoak eragin izanaren erantzule gisa ikertuak direla esan diete. Zubietarrak dira bi, lasartearra bat eta donostiarra azkena. Gure elkartasun osoa beraiekiko eta mespretxu osoa, klima aldaketaren aurka daudela esan arren, Gipuzkoako gune kutsatzailerik handiena izango dena inposatzeko egin ahalak eta bi egiten ari diren EAJ eta PSEko agintariekiko.

Egun hartan Ertzaintzak biolentzia erabili zuen era baketsuan protestan ari ginen herritarren aurka, eta erraustegien aurka mundu osoko 900 elkarte biltzen dituen GAIA aliantzak ere Ertzaintzaren bortizkeria salatu zuen. Orain, epaiketa hau jauzi kualitatiboa da, erraustegiarekin loturiko aktibismo soziala epaitegietara eraman nahi dutelako lehen aldiz (ez dugu ahazten erraustegiaren proiektua gelditu zuten arduradun politikoen aurkako epaiketak sustatu izan dituztela, Ainhoa Intxaurrandieta eta Iñaki Errazkinen aurka mafia baten gisa jokatuz).

Errausketaren Aurkako Mugimendua osatzen dugun herritarrok epaiketa honetatik ondorioztatzen dugu Eusko Jaurlaritzak eta Gipuzkoako Aldundiak errausketaren aurka gauden herritarrok beldurtu nahi gaituztela. Protesta sozial erabat zilegia kriminalizatzeko saiakera da eta laster piztekoak diren eta frogekin dagoeneko ingurunea kutsatzen hasi den erraustegiaren aurkako protestetan jendeak ez parte hartzea bilatzen dute. Argi esango diegu ba: Ez dute lortuko, ez gaituzte kikilduko.

Erraustegiaren Aurkako Mugimendua gizartearen aurrean konprometitzen da, azken 16 urteetan bezala, ez-biolentziaren eremuan, borrokan eta ereduen talka eragiten jarraitzera. Herritarrok geure burua defendatzen jarraituko dugu.

Urteak dira erabat demostratuta geratu dela, Gipuzkoako herri gehienetara begiratuz, hondakinen bereizketa modu eraginkorrean eginez gero, munstro toxiko hau ez dugula behar. Eta nahiz eta gaur egungo agintariak tematuko diren esaten “hondakinen arazoa” konpondu dutela, herritarrok sentitzen duguna guztiz kontrakoa da: orain bai daukagu arazo bat, eta larria gainera; hurrengo belaunaldiei eta inguruan bizi diren milaka eta milaka herritarrei modu larrian eragiten diena.

Etsita eta etxean nahi gaituzten arren, protestan jarraituko dugu. Horregatik, lehenik eta behin epaitegira deitu dituzten lagunei elkartasuna adierazteko kontzentrazio urgenteak deitzen ditugu Donostian, Egiako epaitegiaren aurrean:

Abenduaren 4an, asteazkena: 11:00etan.
Abenduaren 9an, astelehena: 10:30ean.
Urtarrilaren 9an, osteguna: 10:30ean.

Protesta sozialen aurkako epaiketen gainetik, guk argi dugu: Erraustegirik ez!
Zatoz eta babes dezagun elkar.

Erlazionatuak

Probaldi fasean den erraustegiaren aurrean mozio urgentea onartu du Udalak EHBilduren babesarekin, EAJ eta PSE aurka agertu dira

Usurbil

Erraustegia probaldi fasean piztu zuten atzo eta atzo deitua zegoen udalbatzaren osoko bilkura. Egoerak eragindako kezka eta haserrea plenora erama...
Probaldi fasean den erraustegiaren aurrean, etxeetan xingola beltzak jarri eta manifestatzera deitu du Udalak abenduaren 13an

Usurbil

Etxeetako balkoi eta leihoak xingola beltzez jantzi (Udalak ere xingola erraldoi bat esekiko du) eta abenduaren 13an 19:00etan udaletxe ataritik ab...
Ke zutabe handia, gaur probaldi fasean jartzekoa zuten erraustegitik

Zubieta

Eguerdi partean ke zutabe handia ikusi da Zubietako errausketaren zero gunetik. Gogoan izan, erraustegia ostegun honetan jartzekoa zuten martxan pr...