Eskolaz kanpoko euskara errefortzu programa honetan aritzeko "heritzaile eta irakasle bila gabiltza!" jakinarazi dute sustatzaileek. Gogorarazi dutenez, "Udalak haur eta nerabeentzako euskara errefortzu klaseak eskainiko ditu 2023-24 ikasturtean, herriko hiru ikastetxeekin eta Ttakun Kultur Elkartearekin elkarlanean".
Lan deialdi honetarako, kontuan hartuko dute "usurbildarra izatea, ikasketak, esperientzia eta euskara gaitasuna". Curriculumak bidaltzeko uztailaren 2ra arteko epea finkatu dute. Helbide honetara igorri beharko dira: zerbitzuak@ttakun.eus
Astean hiru ordu
Euskara errefortzuko programa berri hau, eskolatik kanpo eskainiko da, urritik aurrera, euskalduntze beharra duten gaztetxoei zuzendua egongo da. Helburu bikoitza du egitasmo berri honek; "alde batetik, euskara ez dakiten ikasle etorkinei berariazko laguntza eskaintzea, hizkuntza eta komunikazio trebetasunak lehenbailehen eskura ditzaten, eta bestetik, ikasle horiei hezkuntza sisteman sartzen laguntzea", sustatzaileek ekainaren 12ko agerraldian azaldu zutenez.
Proiektu honen bueltan batu dira hain zuzen, Usurbilgo Udala, Udarregi ikastola eta Aginaga zein Zubietako eskolak. Zerbitzu berri hau Lasarte-Oriako Ttakun elkarteak dinamizatuko du. Dinamika parte hartzailea izango dela aurreratu du, "alderdi ludikoa ardatz izanda, ahozkotasunaren lanketan zentratua" egongo dena.
Ezagutza eta erabilera maila ezberdinak egon daitezkeenez, "bakoitzaren egoerara moldatzen eta horrekin batera talde bakoitzean dauden ezberdintasun horiek ahalik eta txukunen kudeatzen saiatuko gara". Talde txikiak osatzea proposatzen dute, gehienez 10-12 lagunekoak, Asmoa, bost talde osatzea da; Aginagan eta Zubietan bana eta beste hiru Usurbilen. HH5etik DBH4ra arteko gaztetxoei zuzenduriko eskaintza izango da. Astean hiru ordukoa, ordu eta erdiko bi saiotan banatua.
