Zubietako erraustegia

Erraustegitik isuritako ezohiko amoniako kopurua, asteburuan ehunka arrain hilik agerturiko Arkaitzerrekan

GHK-k erraustegiarekin loturarik egon zitekeenik ukatu zuen arren, azkenean bai, erraustegiaren eremutik isuritako amoniakoa izan liteke Arkaitzerrekako ehunka arrain hiltzea eragin zuena joan den asteburuan. GHK-k erraustegia kudeatzen duen Ekondakin enpresari zigor espedientea zabaldu dio. Usurbilgo Udalak asteburuan hartutako laginek ere gauza bera berresten dute: ezohiko amoniako kopurua antzeman zuten Zubietako Arkaitzerrekan.

Ikerketapean egon arren, Gipuzkoako Hondakinen Kontsortzioak Zubieta gaineko azpiegituren urak kudeatzeko sistema itxi eta propioak zituztela adierazi zuen asteburuan, Arkaitzerrekan ehunka arrain agertu ostean. Euri-uren deposituak soilik isurtzen dituela, euri-urak.

Ostegun iluntze honetan ordea egoera zeharo aldatu da. Gipuzkoako Hondakinen Kontsortzioak aditzera eman duenez, erraustegia kudeatzen duen Ekondakin enpresari zigor espedientea irekitzea erabaki du. Berria egunkariaren arabera, "erraustegitik kanpoko" kamioi bat maiatzaren 7an deskarga egiten ari zenean amoniako isuria gertatu zen.

Ildo beretik, Usurbilgo Udalak ur eta hildako arrainen laginak hartu zituen Arkaitzerrekan, arrainik hilik agertu ziren joan den asteburuan. Laborategira bidali zituen. Ostegun iluntze honetan jaso ditu emaitzak. Pentsa, "inguruko erreketan, 1mg/l amoniako izan ohi da kontzentrazio ohikoa", Usurbilgo Udalaren esanetan. "Igandean, 62 mg/l amoniako neurtu ziren". Begi bistakoa honenbestez, guztiz ezohikoa zen amoniako kopurua erregistratu zela Arkaitzerrekan. "Arrainen azterketaren emaitzak jakiteko egun gehiago beharko dira".

Datuok eskutan, sare sozialen bidez Usurbilgo alkate Agurtzane Solaberrietak adierazi duenez, "ez genbiltzan oker, Asensio jauna: Arkaitzerrekako kutsadura errauste-plantak eragin du. Eta orain zer? Ze neurri zuzentzaile hartuko dituzue berriz ez errepikatzeko? Zeintzuk dira kontrol-mekanismoak? Nork babestuko gaitu? Erantzunak behar ditugu: gardentasuna".


 
Erlazionatuak

Gardentasun eza salatu eta neurri zuzentzaileak eskatu ditu Usurbilgo alkateak

Zubieta

Asteburuan Zubietako errekan gertaturiko ahalik eta azkarren argitzea eskatu du Usurbilgo alkate Agurtzane Solaberrietak. Gertatu denarekiko garden...
Zubietan hilik agerturiko arrainen harira, GHK-k adierazitakoa gezurtatu du GuraSOSek

Zubieta

Gipuzkoako Hondakinen Kontsortzioaren esanetan, Zubieta gaineko azpiegiturek (tartean erraustegiak) ez dute zerikusirik izan, larunbatean Arkaitz e...
Auzia ikerketapean egon arren, GHK-k ukatu egin du erraustegiak hildako arrainekin zerikusirik duenik

Zubieta

Gipuzkoako Hondakinen Kontsortzioak (GHK) ohartarazi duenez, Zubieta gaineko azpiegiturek erreketara ez dute ezer isurtzen. Euri-uren biltegia da s...
J.I. Asensio, foru ingurumen diputatua: "Nor izan den eta zergatik gertatu den jakin nahi dugu"

Zubieta

Aurrez beste bi isuri izan zirela zehaztu du, baina ukatu egin du kasuotan Zubieta gaineko azpiegiturek eragin zituztenik.
Aingirak eta arrainak hilda erraustegi azpiko errekan

Zubieta

Itxura ezin kezkagarriagoa agertu du gaur, Zubietako erraustegi azpiko errekak. Urak zekarrena heriotzaren irudi argia zen; hainbat arrain eta aing...